Shillong, Risaw 25: Ka jingpynlut ksan u Lamphang barim ka Meghalaya Legislative Assembly u Bah Charles Pyngrope, iaka pisa u paidbah kala mih madan, hadien ba u Bah EK Wahlang na ka shnong Puriang ula pan da ka Right to Information (RTI) halor ka jingpynlut pynsep ha kaba iadei ba ka jingpynshna ne maramot iaka iing dorbar thawaiñ kaba don ha Khyndailad bad Rilbong kata naduh u snem 2009- haduh 2012 kala kot sha ki khlur tyngka.
Ka jinglap u Bah Wahlang lyngba ka RTI ka paw shai ba tang ban tei thymmai bad maramot itynnad ia ka kamra treikam u Lamphang ka iing dorbar Thawain ha Khyndailad ka kot sha ka 3,67,30,855 tyngka kata ha u snem 2012. Hynrei katba kiwei ki jingpyntrei kiba dei tang ha u snem 2012 ki kynthup iaka maramot itynnad ia ka jingker (fencing) ha Kyndailad bad Rilbong kaba kot 10,59,500 tyngka bad 5,28,750. Ka jingai rong iaka kamra u Shongknor, kamra u PS ka kot sha ka 2,91,873 tyngka.
Katba ka jingsiang carpet iaka kamra u Shongknor lem bad kiwei ki kamra ka kot sha ka 3,84,868. Ka jingpynmih kamra iaka ophis treikam jongka Meghalaya Legislator Forum halor ka HIV/AIDS ha Khyndailad ka kot 17,44,000 tyngka bad ruh ka jingpynmih kamra iaka ophis treikam jongka Legislator Forum halor ka HIV/AIDS ha Meghalaya Legislative Assembly ka kot sha ka 5,81,333 tyngka.
Ka jingsiang lyntang iing bad ka jingairong iaka kamra u Lamphang ka kot sha ka 3,03,267 tyngka. Ka jingpynkha kamra na ka bynta ki Mali kynthup iaki nongtrei Electrical jongka Meghalaya Legislative Assembly ka kot sha ka 60,847 tyngka.
Ka jingshna pynbha iaki ki kynroh jongka Control Room ba kynthup ruh iaka Arts & culture ha Rilbong ka kot sha ka 26,65,680 tyngka. Ka jingshna ia ka tnum da ki tin Dyna ha Kamra u Speaker, Deputy Speaker, Legal Adviser bad PS jong u Speaker ha MLA Rilbong ka kot sha ka 7,14,750 tyngka.
Ka jingshna pynbha ban maramot pynitynnad, ka jingairong bad ka jingphiah kamra Library ha Old High Court jongka iing dorbar thawaiñ ka kot sha ka 99,590 tyngka. Katba ka jingshna pynbha ban maramot pynitynnad, ka jingairong ia ophis, ka Account Branch bad kiwei ka kot sha ka 5,51,300 tyngka. Ka jingpynmih kamra iaka store room bad artylli kiwei pat ha Old High Court Building jongka Meghalaya Legislative Assembly ka kot sha ka 7, 00,000 tyngka.
Katba ha u snem 2009 la lap ba ka jingpynlut lyngba ka jingtei bad maramot, ka jingairong bad ruh ka jingpynbiang iaki mar ki mata kiba donkam hapoh ka iing dorbar ka kot sha ka 4,54,270 tyngka. Ka jingpynkha kamra na ka bynta u OSD jong u Speaker ha Secretariat Assembly ka kot 1,05,900 tyngka.
Katba ha u snem 2010 ka RTI kala shem ba ka juh ka dor jongka jingpynlut ban pynkha kamra na ka bynta u OSD ka kot sha ka 1,05,900 tyngka.
Shuh shuh ka RTI kala pynpaw ba ha ka snem 2011, u Lamphang ula pynlut na ka bynta ban pyntrei ne ban shna iaki kamra leit shabar (toilet) ar mala bad kiwei ki jingdonkam ka kot sha ka 8,63,753 tyngka. Ka jingmaramot pynitynnad iaka kamra jongu shongknor ka kot sha ka 17,86,379.
Ka jingshna ia ka nala na kamra u Speaker sharud surok jongka iing dorbar ka kot sha ka 94,026 tyngka. Ka jingshna thymmai iaki kamra leit shabar ha kamra Computer Typist bad ruh ka jingshna iaka kamra u Joint Secretary, Civil Engineer bad ka ing ap pahara (Guard Room) ka kot sha ka 2,25,240 tyngka. Ka jingmaramot iaka jingkhang ban leit shabar jongu PS jongu Speaker ha iing Dorbar Thawain ka kot sha ka 28, 990 tyngka.
Hynrei lyngba kane ka RTI la lap ba ki don artylli ki jingpyntrei kaba ka kam kala dep hynrei ka dor pisa kaba la mang ne siew kam paw satia, kine ki kynthup iaka jingshna iaka sem kali bad iaka jaka ap pahara, ka pynpynpoi um sha ki kamra jongu Speaker bad jongki EX-MLA.
Ym tang katta ka RTI ka pynpaw ba ka jingpynlut u Lamphang tang ha ka jingdihsha kata naduh ka snem 2008- 2009- 2010, 2011, 2012 ka poi sha ka 2,15,281 tyngka.
