Shillong, Iaiong 20: Ki paidbah jong kane ka nongbah Shillong mynta ka sngi da ki phew hajar ngut ki la ia leit sha polo ban sakhi ia ka jingpyninam jong ki shipai ia ka rukom niah bike jong ki ha duh ba ki la ioh ia ka nam lah duh haka pyrthei hi baroh kawei ia ka rukom niah bike.
.U Major General Gurdip Singh Chief of Staff HQ 101 area, ha ka jingkren ka jong u la ong ba kane ka jingpyninam ka long ban rakhe ia ka jingdap 50 snem jong kane ka kyhun shipai ba ki poi ha kane ka nongbah Shillong.
Ha ka juh ka por u la ong ba kan long ruh kum ka jingkhring ia ki samla kane ka dong shatei lam mih ngi jong ka Ri India ba kin wan sha khmat ban rung ha ka kam shipai kumba ka long mynta ka kynhun shipai jong ka Ri India ka dei ka wei na ki kynhun shipai kiba tbit tam ha ka pyrthei.
Ia kane ka jingpyninam la pynlong hapoh ka jingpyniaid jong u Lieutenant General RS Panwar GOC HQ 101 area. Ia kane ka jingpyni nam la tip kum ka “SHWET ASHW” . Nalor kane ka jingpyninam ia ka rukomniahbike la pyni ruh ia ka jingstad jong ki ksew bad ki kulai ha kaba ki paidbah ki la hun shisha ban peitkai.
Ia kane ka juh ka jingpyninam yn sa pyni ha ka 23 tarik mynta u bnai ha Garison Ground ha ka sngi ba kan don ruh ka Mela ha kane ka sngi. Na ka liang jong ki shipai ki la ai burom kyrpang ia ka tnad shipai jong ka GTC bad ia u Brigadier Manohar Thomas commandant of 58 GTC bad ka kynhun baroh kawei ban pynkhreh ia kane ka madan ba kan long kaba bit ban pyndon kam mynta ka sngi wat hapdeng ka jingslap jong ka bneng.(SP News)
