New Delhi Nailar03: Ka jingiakynad iapher jaidbynriew ha bangladesh ka la khih ha ka jaka kaba la tip kum ka Tabalchari Thana kaba ha poh jong ka Matiranga Sub-District jong ka Chittagong Hill Tracts jong ka Ri Bangladesh ha dien ba ki briew kiba sah ha Ri Thor ki la leit ban hiar thma ia ki riewlum kiba dei na ka jaid bynriew Chakma bad ki Tripura.
Kane ka jingleh ka long ban knieh da ka bor ia ka jaka jong ki riewlum, ki shnong kiba la shah thombor ki long san tylli ka, Sarveshawar Para, Boga Para, Manudas Para, Bhagawan Tilla bad ka Bandar Singh Para kiba hap hapoh jong ka Tabalchari police station. Kine ki shnong baroh san tylli ki la shah thang ha kane ka jingjia u wei u la iap bad saw ngut ki la mynsaw bad baroh ki iing kiba la shah thang ki long 500 tylli.
Kane ka jingkhein ka dei katkum ka jingklum jingtip jong ka kaba la ioh mynta ka sngi da ka Asian Centre for Human Rights. Ha kane ka jingpynlait khubor jong ka ACHR ka la ong ba ki Bangladesh Border Guard ha ka jaka ba kin iarap ia kiba mynsaw ki kem kylla pynban ia kiba lui lui.
Kiba la shah kem ki long u Bakul Chakma, Supayan Chakma bad u Phani Bhusan Chakma, kine ki dei ki dkhot jong ki tei ki shong kiba long dkhot hapoh jong ka local Union Council ia kine la pynshitomjur da ki bor jong ka Ri Bangladesh hapoh phatok la ong u Suhas Chakma, Director ka Asian Centre for Human Rights.
Kumba 1,500 ngut ki jaidbynriew Chakmas bad ki jaidbynriew Tripuris mynta ka la wan tur sha India bad ki don ha ki khyrdop ba la ap da ki shipai BSF ha khappud ka India bad Bangladesh ha ka jaka kaba la tip kum ka Silachari hapoh kajylla Tripura ha kaba ki shipai BSF ki la pyrkhing bha ban nym ailad ia ki ban rung sha India.
Ka Asian Centre for Human Rights ka la kyntu ia ka sorkar India ba kan bthah ia ki shipai BSF ba kin shah ia kine ki lanot ban sah shipor katba ka jingiakhih ka dang iaid bad kin sa leitphai ynda ka la jem jia. Ka ACHR ka la dawa na ka sorkar Bangladesh ba kan ai ia ka jingiada ia ki riewlum jong katei ka Ri.(SP News)
