Shillong, Jymmang 19: Ban pyndun ai ka jingkyrduh ki doctor ha kane ka jylla Meghalaya, ki bor sorkar mynta ki dang don hapdeng ka jingpyrkhat ban pynkiew noh ia ka rta shongthait jong ki doctor na ka 58 sha ka 62 snem ka rta.
Ki lad khubor ki iathuh ha u SP News Agency ba kane ka jingpyrkhat ka la iaid bha ha ki bor sorkar namar ka jingduna jong ki doctor ka long kaba la palat ha kane ka jylla Meghalaya.
Naka liang jong ka sorkar ka la pyrshah ban shu khot ia ki doctor kiba na shabar ruh da kaba shu ai kontrak ia ki hynrei kane kam shym la lah ban khring ia ki doctor bana sha bar ba kin wan trei ha kane ka jylla.
Ka jylla Meghalaya mynta ka dang peit ia ka rukom leh jong ka jylla Mizoram kaba la iaid sha khmat ha kane ka jingpynkhreh ban kyntiew ia ka rta shong thait ia ki doctor na ka 58 snem sha 62 snem . Katei ka jylla ka dang pynkhreh mynta kam pat pyntrei kam.
Ka jylla Meghalaya ka la shna 28 tylli ki CHC, 108 tylli ki PHC bad kumba 611 tylli ki sub Centre, hynrei na ka daw jong ka jingbym don ia ki doctor bad ia ki ANM ne ki nurse ka la pynlong ba ki jaka sumar jong ka sorkar kim shym la trei kam kumba la mang.(SP News)
