Shillong jymmang 07: Ka Balang Presbyterian Mawlong, kaba la seng ia ka ha u snem 1914, kan dap mynta 100 snem mynta u snem bad kane ka jingrakhe dap 100 snem jong ka, ka la sdang ha ka Sngi Nyngkong, ha kaba ka la plie ia u mot sah jingkynmaw ha phyllaw jong katei ka Ïingmane.
Ia utei u mot sah jingkymmaw, la plie da u Revd NW Marsing, uba long uwei na ki Pastor rangbah jong ka Ri-Bhoi Synod bad ba la don ryngkat u Revd JR Makdoh, Pastor Incharge ka district, u Tbn (Dr) HJ Syiem, ki riew rangbah lem bad ki riewdkhot bad ki dkhot ka Balang Presbyterian Mawlong.
Ka jingiaseng rakhe ia ka jingdap 100 snem kan long ha kane ka Sngi U Trai, ka 11 tarik Jymmang, 2014, ha kaba ka Balang ka la pynkhreh ruh ia ka Theme jong ka, kaba ong, “Long ka Mon jong Me”.
Ha ka jingiaseng kaba 10.30 mynstep, u nongkren un long u Revd IK Kharshiing, katba ha ka jingiaseng kaba 1.30 nohphai sngi, u nongkren un long u Revd MS Shadap, u Pastor rangbah ba la shongthait jong ka Ri-Bhoi Synod.
Ka Balang Mawlong ka khot bad wer ia baroh ki parabangeit jong ka Balang, ki khun jong ka Balang ki bym don shuh ha ka Balang hadien ba ki la rah kyrteng sha kiwei ki jaka ba kin wan sha katei ka jingiaseng dap 100 snem, ka ban long ha katei ka Sngi U Trai ban ioh bynta lang ha katei ka jingrakhe bad ban iohsngew ruh ia kaei ba ki shakri jong U Blei kin pynsngew ia ka Khubor na ka Ktien jong U.
Na ka liang u Secretary ka Centenary Jubilee Committee jong ka Balang, u Bah Remington Syiem, u la ong ba la phah ia ki shithi sha ki khun jong ka Balang kiba la long ki dkhot barim jong ka Balang ba kin wan sha katei ka jingiaseng bad u la bynrap ruh ba lada kim pat ioh ia ka shithi ba la phah ruh, hynrei, kin sngewbha pat ban shim ia kane ka khubor kum ka jingpyntip, ioh lehse kim poi na ki daw bym lah kiar, hynrei la pyrshang ban pynpoi sha man la iwei pa iwei ki dkhot barim jong ka Balang kiba la don bynta bad ka Balang naduh ki snem ba kham mynshuwa.(SP News)
