Nongpoh, Jymmang 27: Mynta ka sngi ki Rangbah Shnong jong ki 20 tylli ki shnong hapoh kane ka mawhati konstituensi ki la dawa tyngeh na ki bor jong ka district ba kin khang khyrdep noh mardor ia ka kompani ri syiar kaba don ha ka shnong Mawthei na ka bynta ban pynbit pynbiang ia ki jingdonkam na ka bynta ban iada ia ka jingpyntuid ia ki jaboh bad ki jakhlia kiba mih na kane ka kompani kiba la pyntuid sha ka wah Umtrew,
Ia katei ka rai ban dawa khang khyrdep noh mardor ia kane ka kompani ri syiar ki rangbah shnong jong ki 20 tylli ki shnong ki la shim mynta ka sngi hadien ka jingleit jurip kaba ar sien ia kane ka kompani ha ka jingiadonlang ryngkat bad ki bor pyniaid district ba la mihkhmat da ka Kong M. Lytan, EAC jong ka district.
Ha kane ka jingleit jurip la sakhi ba katei ka kompani kam shem la lah ban shimkhia ei ei ruh em na ka bynta ban buh ia ki lad jingiada na ka jingpyntuid ia ki jakhlia kiba mih na ka kompani sha ka wah Umtrew kaba kitei ki 20 shnong ki ju pyndonkam na ka bynta ka umbam umdih bad kiwei kiwei, watla na ka liang ki rangbah shnong ki la dep ban aipor lypa shibnai ia kane ka kompani ban shim ia ki lad ki lynti kumno ban iada ia ki jingjakhlia ban nym pyntuid sha katei ka wah hynrei ha kane ka jingleit jurip la sakhia ba katei ka kompani kam shem la suidñiew ne kheiñkor ei ei.
Haba ia kren bad u Bah F. Nongkseh, Rangbah Shnong jong ka Nongjri hadien ka jingjurip, u la iathuh ba na ka liang ki rangbah shnong na ki 20 tylli ki shnong kiba ju tan um na ka Wah Umtrew na ka bynta ban pynbit pynbiang ia ki jingdonkam jong ki paidbah nongshong shnong, ki dap da ka jingsngewkhia bad ruh da ka jingsngewbitar halor kane ka jingkuman jong ki bor ba dei peit jong katei ka kompani ri syiar, ba watla ki rangbah shnong ki la dep ban aipor shibnai na ka bynta ban pynkhuid bad ruh ban wad ia ki lad ki lynti kumno ban iada ia ki jakhlia ba mih na kane ka kompani ba kan nym tuid sha kane ka wah hynrei ki bor jong kane ka kompani kim shem la leh ei ei ia kaba donkam tad haduh kane ka khyllipmat.
“Kaba kham sngewsih ka long ba ymtang ba kane ka kompani ka la pynmih ia ka jingjakhlia bad ka jingsniew hapoh katei ka wah da kaba pyntuid ia ki jakhlia kum ki eit syiar bad kiwei kiwei sha kane ka wah tad haduh ba ki paidbah nongshong shnong kim nud shuh wat ban pyndonkam ia ka um na kane ka wah,”, kren bynñiaw u Bah Nongkseh.
U la iathuh, ba watla ki bor pyniaid shnong ki la kyrpad sha ki bor jong kane ka kompani ri syiar ba kin shim ia ki lad kiba kongsan kumno ban iada na ki jingma kiba lah ban ktah ia ka koit ka khiah jong ki paidbah nongshong shnong, hynrei kumba la sakhi ba kitei ki heh kane ka kompani kim patiaw ei ei halor kane ka jingkyrpad jong ki rangbah shnong, kumta hadien ba la kut noh ka jingaipor ia kane ka kompani kaba dei shibnai tam hynrei la sakhi ruh ba kam shem la leh ei ei halor kane, kum ki rangbah shnong ki la leit ban ujor ruh sha ki bor jong ka district bad ruh ban leit jurip mynta ka sngi.
U Bah Nongkseh u la ong ruh, ba hadien kane ka jingjurip kaba la pynlong ha ryngkat bad ka magistrate la sakhi tikna ba kane ka kompani kam patiaw ei ei halor ka koit ka khiah jong ki paidbah babun balang.SP news)
