Jowai, May 12: Ha ka jingiadei bad ka jingkhang noh jong ka Iingbishar ba don burom, ka National Green Tribunal (NGT) ia ka rukom tih dewiong kaba mynta ha ka jylla Meghalaya kat kum ka hokum jong ka kaba ka la pynmih ha ka 17 tarik u bnai ba lah dep da ka ba ong ba ka rukom tih dewiong kaba mynta ha ka jylla ka la long kaba beain namar kane ka la ktah ia ka mariang, ka AJYWO Central (G) Body ka dawa na ka sorkar Meghalaya ba lada jia ba ka NGT kam pyllait shuh ia kane ka rukom tih dewiong ha ka jylla, ka sorkar Meghalaya ha shwa ba kan pyntrei kam ia ka Meghalaya Mines and Mineral Policy 2012, ka dei ban pynkylla ktien noh shwa ia kane ka aiñ kaba ka la dep pass ha ka 5 tarik u November 2014 sha ka ktien Khasi, Jaintia bad Garo khnang ba ki paidbah kin ioh pule bniah, puson bad sngewthuh shai ia katei ka policy, la katei ka policy kan long ne em naka bynta ka jingmyntoi ki trai ri trai muluk ne kin myntoi ki nongwei?
U bah M H Dkhar President ka AJYWO sengkmie u la ong, “ Ka AJYWO ka pyrshah ia ka ne ka Meghalaya Mines and Minerals Policy 2012 kaba mynta namar kam long kaba shai. Ngi kyntu ruh ia u paidbah jong ka jylla Meghalaya ba kim dei ban long kiba kyrkieh ha ka ban shu pdiang ruma ban pyntrei kam ia ka ha ka jylla namar don shibun kiei kiei kiba don ha katei ka policy ki bym shai bad kiba buh ia u paidbah trai ri trai muluk ha ka umdum.
“Hooid ka long kaba shisha, ba lada jia ba ka NGT kan khang syndon tdam ia ka jingtih bad khaii dewiong ha Meghalaya da ki lak ki lak ngut ki briew kin shah thngan ha ka jylla Meghalaya bad na ka bynta kane ka sorkar Meghalaya kan sa ia kynduh mawsiang namar kan long kaba eh ia kitei ki paidbah ban kylla ia kane ka rukom kaba ki la bud da ki phew phew snem tang ha ki por kiba lyngkot,” ong u Bah M H Dkhar
U Bah M H Dkhar u la ong ba ka seng ka sngewkhia jur bha halor kane ka hukum ba jyndat jong ka Ingbishar ba don burom, ka NGT ka ban sa ktah ia ki lak ki lak ngut ki paidbah jong ka jylla. Mynta la 40 snem ka jingtih dewiong kat kum ba ka long mynta, ka la iaid ha ka jylla Meghalaya, ban shu khang jyndat pat kumne khlem da pynsngewthuh bad ai por ia u paidbah ban pyrkhat, ka long kaei kaei kaba ban sa kylla long ka jingtim ia ki lakh ngut ki paidbah kiba shait im jakpoh na kaba khaii bad bylla dewiong.
U bah M H Dkhar u la ong ba lada jia ba ka Iingbishar ba don burom, ka NGT kam map shuh ia ka Meghalaya, kaba sheptieng mynta ka long ba lada jia ba poi u pud ha kaba ia ka Meghalaya Mines and Minerals Policy 2012 yn pyntrei kam ha ka jylla kat kum ba ka long mynta (present form), ioh ba ki paidbah kin sa shah ktah jur da ka jingpyntreikam ia katei ka policy namar kane ka policy kaba mynta kam long kaba shai, la kan ai jingmyntoi ia ki trai ri trai muluk? ne tang ia ki katto katne ngut ki ba don spah bad don ha ka bor? ne tang ia ki nongwei?
Na ka bynta ka jingshai lang jong baroh u paidbah nongshongshnong jong ka jylla Meghalaya, ka AJYWO ka dawa na ka sorkar jylla ba ka dei ban pynkylla ktien shwa ia ka Mines and Minerals Policy 2012 sha ka ktien Khasi, Jaintia bad Garo, khnang ba u paidbah un ioh ban pule bniah ia ka bad ruh sngewthuh shai ia ki kyndon jong katei ka policy la ka ia hap dur ne em kat kum ka jinglong jingman jong kane ka jylla jong ngi kaba hap hapoh ka jingkdup jong ka 6th Sheduled jong ka Riti Synshar jong ka Ri India ha kaba ka ka rukom bat khyndew bat shyiap ka iapher bak-ly-bak na kiwei pat ki jylla jong ka Ri India bad ruh la katei ka Mines and Minerals Policy 2012 kan wanrah jingmyntoi ne em ia ki trai ri trai muluk?(SP News)
