Shillong, Kyllalyngkot 13:Ka Synjuk ki longkmie kaba la tip ka A’chik Mother’s Association (AMA), Tura ka la pynpaw ka jingsngew khia jur halor ka jinglong jingman ha Ri lum Garo, ka la kdew ba ka jingjia bthei bomb hynnin ka miet sngi Saitjain hajan Hawakhana petrol pump ka la pynsier ia ki paidbah nongleit nongwan.
Ka Babyona M Sangma, Secretary AMA ka la ong, ba ka synjuk ka pdiang ia ka jingkhynra lehnoh ki pulit ha Darengagal kaba don hajan Chunmati Dobasipara, Tura hynrei ka la pyrshah pat ia ka jingleh ki pulit kiba la rah ia ki 15 ngut ki samla hynne ka step sngi U Blei.
Ka la ong, ba kitei ki khynnah ki dei kiba lui lui bad kim don kti eiei halor ka katei ka jingjia, ngi dawa ba ka sorkar ka dei ban pyllait noh mardor. “Ka sorkar ka dei ban shim khia ia ka jinglong jingman ha Garo Hills bad ngi kyntu ban wanrah ia ka shongsuk shongsain ia u paidbah ha ri lum Garo Hills” ka la bynrap.
La ithuh ba ki pulit ki dang pynlong ka jingthwet ia ki kynhun pyntriem ha katei ka thain haduh hynne janmiet.(SP News)
