Nongpoh, Nailar 05: Ka Confederation of Ri-Bhoi People (CoRP), Eastern
Zone ha ka jignwad bniah jong ka ka la lap ba ki don haduh 17 tylli ki shnong kiba hap ha Block II ki ne ki la jah rngai noh na ka jignthoh kaba la buh ha ka Annual Action Plan jong u snem 2014-15 ba pynkhreh da ka ophis ka District Medical & Health Officer
(DM&HO), Ri-Bhoi district Mawlasnai PHC.
Ka CoRP ka buh ia ka jingkylli shaei kitei ki 17 shnong ki jah rngai na ka list jong ka Mawlasnai PHC bad balei ka tnat ka koit ka khiah kam ithuh ia ki shnong ba ki dei na kane ka jylla, ha kaba ha kiwei ki skhim kum ka MGNREGS bad ki skhim
sorkar kitei ki shnong ki ioh jingiarap beit na ka sorkar jylla, katba ha ka tnat ka koit ka khiah kim don kyrteng satia bad kim hap ha kane ,ka jylla bad ha katei ka PHC.
U nongialam katei ka seng u la iathuh ruh ba katkum katei ka jingthmu jong ka tnat ka koit ka khiah, la shem ba ka Mawlasnai PHC ka don ia ka jingdon briew kaba 12679 ngut bad kaba pynpaw ruh ba ki shynrang ki kham bun ban ia ki khynthei
Ha kaba iadei bad kane, na ka liang ka CoRP ka dawa na ka sorkar jylla bad ka tnat ka koit ka khiah ban ai jingshai halor kano ka nongrim ba kitei ki 17 shnong kim hap bad don bynta satia bad ka Mawlasnai PHC katba ki nongshong shnong lada ki donkam ban wan shim dawai ki wan beit na katei ka PHC haba mad ia ka pang ka shitom ha ki
met jong ki.
U Bah Pdahkasiej u la ong ruh ba ka tnat ka koit ka khiah kam dei ban leh ia kane khlem da tip ia ka jingdon ki shnong ki thaw hapoh katei ka PHC bad kumba ka seng ka tip tikna ka long ba kitei ki shnong ka Block II ki dei kiba hap hapoh ka Mawlasnai PHC.
Ka tnat ka koit ka khiah kam ithuh ia kitei ki 17 shnong, hato tang kane ka tnat mo kaba weng ia kitei ki shnong ban hap sha kane ka jylla haba baroh ki tnat sorkar kiai jingiarap na Meghalaya sha kitei ki shnong naduh ka Block, ka PWD, PHE bad kiwei kiwei bad dei na katei ka daw ba ka seng ka dawa na katei ka tnat ba ka dei ban ai jingshai halor kane ka jingjah kyrteng kitei ki shnong.(SP News)
