Shillong, Jylliew 23: Ka F.K.J.G.P Sengkmie ka la ioh ban pyniar shuh shuh ia ka tnad treikam jong ka da kaba pynkha sa kawei pat ka Circle, kata ka FKJGP Kynshi Circle. Ha kane ka sngi la iadon ryngkat lang ki nongialam kiba ha khliehduh kata u President Joe Marwein, Gen Secretary Wellbirth Rani, Chief Organiser Samla Marbud Dkhar, Publicity Secretary Samla Eldie Lyngdoh bad ki nongialam ka West Khasi Hills District Palwanbor Syiem President , Arkilos Diengngan Gen. Secretary.
Ha kane ka jingialang la pyniaid da u Samla Marbud Dkhar uba long u Chief Organiser ka Seng. Ha ka jingkren ba la ioh na ki nongialam ka Seng Bah Joe Marwein Bad Bah Wellbirth Rani ki la ban jur ba ka thong bad ka nongrim ka seng hi ka long ban pynkhlain ia ka seng da kaba pynkha ia ki tnad treikam ki bapher-bapher ha ka bri u hynniewtrep ban lah ban iada ia ka Ri bad ka jaidbynriew ha bun ki liang.
Kine ki nongialam kila kyntu ia ki samla ban pyniasoh ialade bad ka seng namar ka jaidbynriew ka donkam ia ki samla ban kyrshan ban iada ia ki jingeh ba ka jaidbynriew ka iakynduh . Ka jingthaw ka seng ia ki Circle/Unit ka long ban nang pynkhlain na ka bynta ban iakhun ia ki ishu ki bapher bapher bad khamtam mynta ba ka seng ka dang iai dawa ban pyntreikam noh ia ka Inner Line Permit ILP. Hadien ba ki samla/Rangbah jong ka shnong Kynshi kila sngewthuh shai ia ki nongrim bad ki mat treikam jong ka seng ki la wan ban pyniasoh ialade bad ka seng.
La pynskhem ia ki nongkitkam da u President ka sengkmie Joe Marwein. Ki nongkit kam jong kane ka shnat kaba thymmai jong ka FKJGP ki long,President – Phillip Warjri, Vice-President – Rangwanbok K.Syntiew, Gen. Secretary – Radbor Diengdoh nalor jong kine la jied ruh ia shibun kiwei pat ki nongkit kam jong kaseng.(SP News)
