Shillong, Jylliew 03: Ka seng Hynniewtrep People Social Organisation (HPSO) ka dawa na ka sorkar ba ka dei ban pynbiang ia ki kali kamai na Shillong sha Nongstoin bad kumjuh na Nongstoin sha Shillong. Kumba ka long mynta kam don kali kamai kaba dei jong ka sorkar.
Na ka liang jong ka seng ka ong ba ki paidbah ki don hapdeng ka jingeh namar ba ki kali jong ki riew shimet ki la shim kabu palat ia ka bai kali khamtam ynda la jan miet bad ha ki sngi u blei bym don kali. Kane ka la buh ia ki paidbah ha ka jingeh.
Na ka liang jong ka seng ka ong ba lada ka sorkar ka lah ban pynbiang ia ki kali kamai ha ka nongbah Shillong ka dei ban pynbiang kali ruh ia ki paidbah nongkyndong khamtam eh ia kane ka thain Nongstoin.
U Bah Banteibok Lyngdoh u dkhot jong katei ka seng u la ong ba ka sorkar ka dei ban peit lem ia ki nongkyndong ym tang ia ka sor Shillong.(SP News)
