Jowai, Nailar 07: Ki nongialam jongka Jaintia Students’ Union (JSU) bad ka Jaintia youth Federation (JYF) mynta ka sngi kila ia kynduh ia u CEM bad ia u Secretary (Executive) jongka JHADC ban pan iaka jingpynshai halor ka jingpynmih hukum jongka Executive Committee ba ki ba trei hapoh ka Council kim bit shuh ban long kum ki Rangbah Shnong bad la aipor ruh iaki ba kin ieh (Resign) noh naka kam rangbah Shnong hapoh ka 20 sngi.
Ha ba pan iaka jingpynshai na ka liang u CEM u la ong ba ki don shibun ki kynrum kynram iaki nongtrei jongka Council lada ki bat iaka kam Rangbah Shnong namar ia U Rangbah Shnong la ai Sanat (recommendation) daka Council bad ha kajuh ka por u trei hapoh ka Council. U la ong ruh ba la don teng ki kam ha kaba kum u Rangbah Shnong ha ka juh ka por kum u nongtrei jongka Council um nang shuh ban jied la un kohnguh iaka Council ne un kohnguh iaka kam shnong kum u Rangbah Shnong.
Hynrei na ka liang kine ki arseng wat lada ioh ia kine ki jingpynshai na u CEM kim pat sngew iahap satia iaka Council ban ai syndon daka hukum ba baroh ki nongtrei ka Council kiba bat iaka kam Rangbah Shnong ha ki shnong jong ki ban hiar ne ieh kam noh kum ki Rangbah Shnong hapoh kane ka por ba lyngkot eh khlem ka jingsngewthuh ka jong ki paidbah namar, ka Council hi kam pat don ka ain kaba khang iaki nongtrei jong ka Council ban ym bit ban bat iaka kam rangbah Shnong.
Kumta lada ka Council ka kwah shisha ban pyntreikam ia kane ka rai jong ka Executive Committee ka la dei ban ailad shwa ia ki paidbah ban ia ai jingmut lang khnang ban tip shai la ka don jingktah ne em ia ki ba long Rangbah shnog. Ha ka juh ka por ka Council ka la dei ban weng shwa ia kane ka Hukum namar ka pynlamwiar ym tang iaki nongtrei ka Council kiba shah jied kum ki Rangbah Shnong hynrei kumjuh iaki paidbah jong kito ki shnong kiba ia tyngkhuh ia kane ka jingeh.
Ha ka juh ka por ruh ba ia u rangbah Shnong hi ha ka no ka no ka shnong la jied ia u da ki paitbah jong ka shnong kat kum ka mon jong ki paitbah ki ba iohi jngai ia ka bor bad ka jinglah jong u ban kit ia kam da ka jingsngewkhia ia ka miat ka bha hapoh shnong poh thaw, khamtam lei lei ha kine ki por jong ka juk jingstad baroh baroh ngi ia kwah lut ban ioh ia ki nongialam shnong da kiba kham shemphang bad sngewthuh ia ka jingkhia ka kam ha shnong ha thaw.(SP News)
