Jowai, Nailar 01: Ki ar seng hadien ka jingiakynduh lang jong ki hynne ka sngi ha office
treikam ka JYF, ki la ia mir jingmut bad pyrkhat sani bha halor ka
jingeh jongki samla wad kam na Ri lum Jaintia ha kaba ki hap ban leit
kiew shaduh sha shillong ban ioh ialeh iaka Examin (written
Interview) haki jinglait kam bapher bapher kiba la khot daka MPSC.
Kane ka jinghap ban leitkiew shaduh sha shillong naka bynta kane ka
Examin kabuh iaka jingeh kaba khraw iaki samla wadkam wadjam khamtam
ia kito kiba wan na ki thain nongkyndong naki jaka ba jngai naka sor
jowai ha kaba ki hap ban wan sah lypa shimiet sha shillong khnang ba
kin duhlah ban iabeh iaka por. Kane ka ktah iaka por ka jongki kumjuh
ki hap ruh ban pyllut iaka pisa kaba bun ban leitsah shaki hotel. Ki
don ruh ki khep ba ki kmie ki kpa kin banse ki hap ban leitlang bad ki
khun ki jongki tangban synran iaki ban leit thoh ia kane ka Exam.
Kumta kum ka jing pynjan iaka jingshakri jongka Commission sha ki
paidbah na ka liang ka JSU bad ka JYF kala buh iaka jingdawa naka
Commission ba nangne shakhmat ha kano kano ka Interview jongki samla
wad kam wad jam ka dei beit ban pyllong haka nongbah Jowai khnang ba
kine ki jingeh kim ia tyngkhuh shuh iaki nongwad kam bad iaki kmie ki
kpa jongki ruh.
Ha kajuh ka por na ka liang kine ki ar tylli ki Seng bhalang ki kyrpad
ia kito ki samla kiba kwah ban thoh iaka exam haka nongbah Jowai kidei
ban kynmaw ban jied iaka jaka thoh Examin (centre) ha Jowai namar ha
ka phom kila ai laitluid ban jied iaka jaka ba ki kwah ban thoh iaka
Examin.
Kine ki ar seng kila pynpaw ba lada ka Commission kam sngap bad pynduh
iaka hok jong ki nong Jaintia na ka liang jongki kim banse ban shim da
kiwei pat ki lad ki lynti.(SP News)
