Jowai Nailar 21: Ka Jaintia Youth Federation (JYF) Sengkmie kala kmen ban iohi lyngba ki lad pathai khubor, ba ka sorkar lyngba u myntri ba dei peit ia ka tnad khlaw, u bah Prestone Tynsong u la shimkhia ha kaba iadei bad ka jingklun ki Kharkhana pynmih dewbilat (cement Companies) ia ka jaka khlaw jong ka jylla kaba la kot haduh 1800
hacter (18 square Kilometer) kaba la lap da ka Joint Inspection Team (JIT) kaba la thung da ka sorkar jylla lyngba ka hokum jong ka sorkar kmie.
Na ka liang jong ka seng JYF sengkmie kaba la ujor syndon da ka PIL pyrshah ia ki Cement Plant kiba don ha East Jaintia Hlls District halor ka jingpynkhein jong ki ia ki kyndon jong ka Forest Conservation Act 1980 ka ain kaba khang pyrshah ia kino kino ki Company ban buh Kharkhana ha ki jaka khlaw. Hynrei kine ki Company ki la pynkhein ia katei ka ain da kaba klun syndon ia ki jaka khlaw haduh 18 square Kilometer.
Ka JYF ka kmen ruh ban iohi ba ka sorkar ka la byrngem ban pynshitom ia kitei ki Kharkhana da kaba hukum ruh ia ki ban thied bujli ia kajaka na ka bynta ban pynlong jaka khlaw da kaba thung ruh ia ki dieng kum ka kuna halor katei ka jingpynkhein ain jong ki.
Hynrei halor katta ka soskular kaba u Myntri u la kren ban iasoi hapdeng ki Company bapher bapher, ka sorkar bad ki trai jaka, ngi na ka liang ka JYF ki don ka jingartatien, ngim sngewthuh ka Soskular aiu katta bad ka don jingmut aiu ban iasoi ia ka soskular bad kitei ki Company pynmih dewbilat.
Kaba pynlyngngoh shuh shuh ia ka JYF ka long halor ka jingkren jong u Myntri kam khlaw ka sorkar, uba la ong, “Ba ka long kaba eh pat ia ki Kharkhana ban ioh jaka shawei na ka bynta ban thung ia ki dieng namar ka ain ba iadei bad ka jingiadie iathied jaka ha ka jylla ka pyrkhing bad kam shah ia ki Company ban thied jaka”.
Ka JYF ka buh ka jingkylli, hato baroh ki jaka kiba ki Company bapher bapher ki la buh ia ki Cement Plants jong ki, kim dei mo kaba ki la dep thied duh kaba long pyrshah ia ka ain Land Transfer Act.
“Ngi don ka jingtip kaba paka ba baroh ki Cement Plant ki la thied duh ia ki jaka bad la transfer ruh ia ki jaka ki puta kiba la thied ha ka kyrteng jong ki Company. Hynrei ngi lyngngoh pat ba u Myntri u la ong ba ka long kaba eh ia ki Company ban ioh thied jaka namar ka ain kam shah. Kaei kata ka Ain, lada katta ka ka ain kadei ka Land Transfer
Act, ngi kyntu ia u Myntri ban wad jingtip kumno pat kitei ki juh ki Company ki ioh ban thied jaka ha kane ka jylla jong ngi”, la pynpaw u President ka seng u Poipynhun Majaw.
“Kitei ki Company ha kaba nyngkong ki thied jaka ha ka kyrteng ki local Director jong ki kiba dei ki trai ri trai muluk bad hadien pat la pynkylla kyrteng ia ki sha ka Company, hato u myntri badonburom jong ngi u don jingtip ne em ia kane? Ka jingwan jong kitei ki Company kam dei na ka bynta ban wanrah ia ka roi ka par ne ban kyntiew ia ngi
ki rit paid hynrei ban kjit ia ka spah ka phew bad ban pynjot ruh ia ki khlaw ki bthap bad ki jaka thung jaka rep jong ki paidbah”, la bynrap u P.Majaw.
Ka JYF ka la kyntu ia u myntri ka tnad Khlaw bad ia ka sorkar ban pynshitom da kaba tyngeh halor katei ka jingleh bymsuidniew jong ki ia ka ain khlaw – ka Forest Conservation Act 1980. Lada ka sorkar kam shym la leh kumba u Myntri u la byrthen, kan paw ba kadei tang ka buit jong ka sorkar ban pynkulmar jingmut ia u paidbah bad ruh ban pynbieij bad ialam bakla ia uba bun ba lang.
Ka JYF kan peitngor ia kane ka rai jong ka sorkar ban kan nym shong kli kti satia lada ka sorkar kam shym la pynshitom ia kitei ki Company kumba la pynpaw da u Myntri ka tnad Khlaw.(SP News)
