Shillong Naitung 03: Ka Employment Cell jong ka KSU Sengkmie kala dawa ba u Chief Post Master General udei ban thung da ki trai ri trai muluk na ka bynta ka kyrdan Gramin Dak Sevak Brand Post Master ha kylleng ki bynta jong ka jylla.
U Chairman ka Employment Cell jong ka KSU Sengkmie u samla Lambokstarwell Marngar, ula ong ba ka tnad iing dak ka dang thmu ban pynrung kam ha ki district bapher bapher jong ka jylla kiba kynthup ha ki 25 tylli ki shnong jong ka East Khasi Hills, 9 tylli ha Ri Bhoi District, 7 tylli ki ha East Jaintia Hills, 9 tylli ha South West Khasi Hills bad 15 tylli ha West Khasi Hills.
Ula ong ruh ba ka Employment Cell kala pyrshang ban leit iakynduh ia u CPMG hynrei kim shym la iohlad ban iakynduh ia u namar ba ym don hapoh ka jylla, kumta ka seng kala dawa ba dei ban pynrung kam da ki samla Trai ri trai muluk namar ki kham sngewthuh khambha bad ki don ki jingtip kiba bniah ia ki jaka bapher bapher.
“Ka seng ka pyrshah jur lada ka ophis ka thung da ki bar jylla ha kitei ki kam kiba lait namar ba kine ki bar jylla ki dei kiba wan na Uttar Pradesh bad kine ki don 11 ngut kiba thmu ban ioh ia katei ka kam” la ong u samla Lambokstarwell ryngkat bad ka kyntu ia ki bor ba dei khmih jong ka Selection Committee kiba khmih ia ka jingpynrungkam kidei ban jied ne thung da ki trai shnong jong kitei ki district.
Une u nongialam ula ong ruh ba lada ki 11 ngut ki bar jylla ki shah thungkam ha kitei ki kam kiba lait, ka seng kam banse ban shim da ki lynti kiba tyngeh namar ba kadei ka jingpynduh ia ka hok jong ki trai shnong bad nangne shakhmat ki ophis ka sorkar kmie ki dei ban pynrungkam nyngkong shwa ia ki trai shnong kiba la bit la biang bha ka jingnang jingstad.
U Chairman ka Employment Cell jong ka KSU ula iathuh ruh ba ka seng la bunsien kala kyrpad ia ki tnad sorkar ba dei ban thungkam nyngkong shwa ha ki kam kiba lait da ki trai ri trai muluk namar ka jingaikam ia u bar jylla ka long pynbna ka jingknieh ia u khewja jong ki trai jylla bad haba pynlong ia ki Interview ne thungkam dei ban aiald shwa ia u Trai jylla namar kum ki trai shnong ki don ia ka hok ban dawa na ka bynta ka jingbit jingbiang jong ki samla khlem kiam khlem jam jong ka jylla.
Ula ong ruh ba lada jia ba ki 11 ngut ki bar jylkla ki shah thung ha kitei ki kam ki donkam ban ioh ia ka No Objection Certificate na ki Rangbah Shnong ban trei ha ki shnong bapher bapher, kumta ka seng kala kyntu ia ki Rangbah Shnong ba da lei lei kim dei ban ai NOC ia kitei ki bar jylla hynrei dei ban khanglad ia ki ban trei ia katei ka kam bad kane ka plie lad pat ia ki samla khlem kam khlem jam ka jylla ban ioh trei bujli noh ia kitei ki kam.(SP News)
