Shillong, Nailur 13: Ka Khasi Student Union (KSU) Thyllaw Border Unit hynnin ka sngi kala leit ban buh daka dorkhas hakhmat u Myntri ka tnad ka koit ka khiah u Bah AL Hek ban dawa iaka sorkar ba ka dei ban buh ia kawei ka Sub Center ha ka shnong Thyllaw, kaba jngai kumba 30 Kms na Mawsynram, East Khasi Hills.
Ka jingdawa jongka seng ban buh iaka Sub Center ha ka shnong Thyllaw kaba kdup ia san tylli ki shnong, kata ka kynthup iaka Thyllaw, Warding, Mawdiengngim, Mawdiengkhid bad Lumdiengngan, ka dei namar bun na kitei ki shnong kim don satia iaka surok bad ka shem jingeh lada don ba pang ba shitom ban pynpoi kloi sha Mawsynram CHC, bad lada ia kane ka Sub Center yn buh ha ka shnong Thyllaw kan long ka jingmyntoi kaba khraw iaki paidbah ka thain.
Katkum ka kyrwoh ba la pyllait da u samla Plusningstar Kariang, Education Secretary ka KSU Thyllaw Border Unit, ula iathuh ba na ka liang ka tnad ka koit ka khiah kala don ka jingthmu ban tei ia ka Sub Center hapoh katei ka shnong hynrei ym lah ban tip kala shu jah khlem da wan ban jurip.
Shuh shuh ula iathuh ba na ka liang u Myntri ula ong ba ia mynta ka tnad kam pat don satia iaka mang tyngka bad ula kular ban shimkhia ia kane bad lyngba ka jingioh iaka mang tyngka bad ruh ban phah iakane jingdawa sha ka ophis u District Medical Health Officer (DMHO).
Na ka liang ka seng kala leit ban buh lang ia kane ka mat jingdawa hakhmat u MLA ka thain u ba long ruh u CEM ka KHADC, u Bah PN Syiem ha kaba na ka liang u Bah Syiem ula kular ban treishitom ban pynioh ia kane ka jingdawa ka seng na ka bynta ka jingmyntoi u paidbah ka thain. Ha ka juh ka por u Bah Syiem ula kular ban phah iaki Engineer ka tnad ka koit ka khiah ban leit jurip shwa ha katei ka shnong.
Na ka liang ka seng ka kyrpad jur ia a tnad ka koit ka khiah ban kan leh eiei na ka bynta ka jingmyntoi u paidbah bad ruh kala kyntu ia u MLA ba un trei shitom ban pynurlong ia kane ka jingthmu.(SP News)
