Shillong, Naiwieng 13: Ka kynhun Meghalaya Right to Information (MRTI) ka la dawa ba ka sorkar ka dei ban pnyklla noh ia ka Meghalaya Lokayukta bad ia ka Up-Lokayukta Act, 2002. Katkum ka jingkren jong u Bah Micheal Syiem u la ong ba kane ka ain kam shym la lah ban trei kam. Ka jylla ka don kam ia ka ain kaba khlain ban ialeh pyrshah ia ki kam bamsap.
U tei u nongialam jong ka MRTI, u la ong ba kumba ka long mynta ha kane ka jylla Meghalaya kam shym la don kano kano ka jingshah pynshitom ia kito kiba la shah kynnoh ba ki la leh klet ia kaei kaei kaba dei ka jong u paidbah namar ka ain Meghalaya Lokayukta Act, 2002 ka dei ka ain kaba khlem don bor ban the la kam ia ki kam bam sap.
Na ka liang jong ka MRTI kan iaid sha khmat ban wad ia ka jingkyrshan jong kiwei dei ki kynhun ban pynbor ia ka sorkar ba kan wanrah ia ka ain kaba khlain bad ia kane kin sdang naduh ka 19 tarik mynta u bnai. Ka por ka la dei ba dei ban don ka ain ban pynshitom ia ki briew ba don ha ka bor ia kiba pyndon kam ia ka bhah jong u paidbah.
Ha ka jingkren jong ka kong Angela Ryngad ka la ong ba lada pynkylla ia ka ain of Lokayuta Act ka dei ban kynthup naduh u myntri rangbah ka jylla, haduh u nongrah shiti u peon, ym tang kata ka dei ban kynthup ruh ia ki seng trei mon sngewbha.
Kumba ka long mynta hapoh jong ka ain Lokayuta Act 2002, kane ka ain ka dei tang ka jingai jingmud sha ka sorkar ba kan leh ia kaba don kam hynrei kam don pat ia ka por ban tohkit bad ban pynshitom ia kiba don kam.(SP News)
