Nongstoin, Nailur 15: Ki dkhot jong ka seng WYF hapoh ka jingialam
jong u President u samla T.S.Shangrit ki la leit iakynduh ia u MS jong
katei ka Hospital, u Dr.D.Lyngdoh bad ha katei ka jingiakynduh la
iakren bniah ha kaba iadei bad ka jingpynkhreh jong ka hospital ban
buh noh ia ka Blood Storage ne ka jaka ban buh ia ka snam kaba ka
Hospital ka wanrah na Shillong.
Ha ka jingiakynduh bad ki dkhot jong katei ka seng, u MS u la iathuh
ba ka jingpynkhreh mynta ka la iaid shaphrang namar ia ka kamra ban
buh ia ka Blood Storage ruh la dep nadong shadong lait satang katto
katne ki jingdonkam hapoh katei ka kamra, nangta u la iathuh ruh ba
shen ki bor ba dei peit jong ka Hospital, kin sa phah training noh ia
u MO uba dei peit ia katei ka bynta bad ruh ba kin pynbit pynbiang ia
ki jingdonkam kum ki License bad kiwei kiwei katkum ka lynti ba ka
sorkar ka buh. Halor kane, na ka liang jong ka seng, ka sngew ban ai
khublei ia utei u khlieh ka Hospital na ka bynta ka jingshimkhia jong
u ia ka jingdonkam jong ki paidbah bad ka seng ka kyrmen ba shen kane
ka Hospital, kan sa ioh noh ia kane ka Blood Storage.
Ha ka jingiakren bad ki lad pathai khubor, u samla T.S.Shangrit, u la
iathuh ba ka seng ka ieng ha ka nongrim ha kane ka kynti ba ka sorkar
ka dei ban buh noh iaka Blood Bank ha katei ka Hospital khnang ba kan
long ka jingkyrkhu ia ki paidbah kiba shah sumar hapoh jong ka kumjuh
ruh ha ki CHC, PHC, ki Sub-Centre kiba don ha ka West Khasi Hills
District baroh kawei. Shuh shuh u la ong ba ka seng ka iohi ba kane ka
mat ka long kaba kongsan ia ki paidbah nongpang namar baroh shikatta,
lada ki donkam snam, ki nongpang ki hap ban her kyrkieh sha Shillong
tang na ka bynta ka snam, kumta ka long kaba dei eh ia ka sorkar ba
kan peit lem ia kane khnang ba kan nym wanrah ia kano kano ka jingeh
ia ki nongpang.(SP News)
