Shillong, Jylliew 06: Ka liang pyrshah hapoh ka iing dorbar jong ka jylla Meghalaya Mynta ka sngi kila wanrah ia ka adjournment motion hapoh ka iing dorbar thawain ha kaba la pdiang da u shnongknor jong ka iing dorbar bad u la ialad ruh ban ia kren kane ka phang ha kaba ia dei bad ka shongsuk shongsain ha ki lum Garo mynta ka sngi.
Haba wanrah ia kane ka mat jingiakren na ka liang jong u MLA ka NPP u James K Sangma u la kynnoh kane ka sorkar mynta kala pyndem ia lade ha ki lehnoh namar ba kam lah ban teh la kam ia ka jingdon ka jingki kaba la ktah jubor ia ka shong suk shnong sain ha Garo Hills ha kaba ki paidbah kim don shuh ka jingshong shngain.
Ka jingmih ki seng lehnoh ha Garo Hills naduh u snem 2010 ka long kumba mih ki tied ha ka por lyiur ka daw ka long ba ka sorkar kam lah ban tehlakam ia ki. Halor jong kine kiei kiei u dawa ba dei ban wan noh da ka president rule ban tem ia ki kam lehnoh.
U nongialam ka liang pyrshah u Dr Donkupar Roy haba kyrshan ia kane ka adjournment u la ong ba ha kine ki saw snem ka jingroi kaba ka jylla ka iohi ka long ka jingkiew jong ki kam lehnoh ha ka jylla.
Kumba ka long mynta ki kam lehnoh ha Garo Hills ym ialah shuh ban teh la kam ia ki, u la ong ba lada na ki 60 ngut ki MLA ki long myntri rangbah ruh kin nym lah ban tem ia kane ka jingeh ban leh ia kane don kam ia ki briew kiba na shabar bad ban leh ia kadei tang da kaba pynjari ia ka president rule. U myntri rangbah ka jylla lada u kwah ba ka jingsuk kan wan biang u la dei ban hiar shuki noh.
Kiwei ki MLA na ka liang pyrshah kiba la ia shim bynta ha kane ka jingiakren ki long u Bah Paul Lyngdoh, Dr Jemino Mawthoh, na ka UDP, Clifford R Marak jong ka GNC baroh kine kila kubur ia kaei kaba ki ba la kren ha khmat ki kwah ia ka president rule. U Nahim D Shira NPP ruh u la ia shim bynta ha kane ka jingiakren.(SP News)
