Shillong, Rymphang 03: Ki nongialam jong ki saw tylli ki sengbhalang kiba trei kam ha East Jaintia Hills District, kiba kynthup ia ka AJYWO-East Jaintia Zone, ka KSU-Khliehriat Circle, ka FKJGP Khliehriat Circle bad ka HNYF-East Jaintia Zone mynta ka sngi ha ryngkat ka jingsynranlang jong u Bah M H Dkhar President ka AJYWO Sengkmie bad ruh u Bah SS Niangti, General Secretary ka KSU-JHDU, ki la ia kynduh ia u Deputy Commissioner jong ka East Jaintia Hills District ban dawa na u ban pyntrei kam noh ia ka Local Taxi Khliehriat Region khnang ban pynsuk ia ka leit ka wan jong u paidbah hapoh jong katei ka District.
“Ngi la ia kynduh ia u DC ka EJHD u ba dei ruh u Regional Transport Officer (RTA)jong ka EJHD mynta ka sngi ha ka office trei kam jong u bad ngi la ai ruh ia ka dorkhas jong ngi ha u bad dawa na u ba mynta ka por ka la dei ia u bad ia ka office jong u DTO jong ka EJH ban pyntrei kam noh ia ka Local Taxi Khliehriat Region ia kaba la mang naduh u snem 2011 hynrei ia kaba ym pat shym la don ba lah ban pyntrei kam haduh mynta mynne ruh wat lada ia ka Local Taxi Khliehriat Region la mang naduh ka por ba ka EJHD ka dang hap hapoh jong ka Jaintia Hills District” ong u Bah WS Suting, President jong ka AJYWO-EJZ.
U Bah Satly Ryngkhlem, u ba dei u President jong ka KSU Khliehriat Circle, u la ong” Mynta ngi la ioh la ka jong ka District, ngi la ioh ruh ia la ka jong ka DTO Office bad ruh ia la ka jong ka Regional Transport Authority, kumta ka por ka la ih bha ia ka office jong u Deputy Commissioner bad ruh ia u DTO jong ka EJHD ban pyntrei kam noh ia ka Local Taxi Khliehriat Region ia kaba la mang naduh u snem 2011”.
“Ngi sngewnguh ia u DC bad U DTO jong ka EJHD namar ka jingtrei shitom jong ha kaba ki la pynkhreh shait shait mynta ban pynurlong ia kane ka kam. Ngi kyrmen ruh ba kane shen kan sa urlong shen. Ngi kyntu ruh ia u DC bad u DTO ka EJHD ba kin pyni da ki kam hynrei ym tang da ki ktien kum ba la leh kiwei pat ki heh officer jong ka Khlliehriat Civil Sub-Division bad ruh jong ka Jaintia Hills District ia ngi ha ki por kiba la dep” bynrap shuh shuh u Bah Suting.
Ki saw seng ha ka dorkhas ba ki la ai ha u DC bad u DTO jong ka EJHD, ki la ong ba lada ka rukom kamai kali hapoh jong ka district jong ngi ka dang long beain kumnne da kaba u kali shimet ruh un ia kamai lang bad ki kali ba la dep applai permit, kane, nalor ba ka long ka kam beain kaba pynjah burom ia ka district EJHD bad ruh wanrah ia kiba bun ki kam sniew ha ka leit ka wan jong u paidbah, kane kan ktah ruh ia kito kiba pli ki ba la dep applai ia ka local permit namar kine ki hap siew ia ki tax ba pher ba pher sha ka sorkar bad ruh wat ia ka ram sha ki bank na ka bynta ki kali jong ki.
“Ngi la ong ruh ia u DC bad u DTO jong ka EJHD ba ngi kum ki saw seng ngi long kiba la pynkhreh ban iarap ia ka office jong ki ha kano kano ka por ba ki don kam ia ki dkhot jong ngi na ka bynta ban pyntrei kam ia katei ka jingdawa jong ngi” ong u Bah S Ryngkhlem.
Kum ban shu pynkynmaw, ka AJYWO Sengkmie hapoh ka jingialam jong u Bah MH Dkhar President jong ka, ka la ujor ia kane ka rukom kamai beain ki kali shimet wat sha duh ka Ministry of Road Transport & Highways (Surface Transport) jong ka sorkar India ha u snem 2011 bad katei ka ministry jong ka sorkar India ka la bthah ruh ia ka sorkar Meghalaya ban pynduh pyndam noh ia katei ka rukom kamai beain ki kali hapoh Khliehriat (C) Sub-Division, hynrei namar ba ka sorkar Meghalaya kam shym leh eiei haduh mynta ruh, kane ka jingkamai kali beain ki kali shimet ha EJHD ka dang sah hi kumjuh haduh kane ka por.(SP News)
