Shillong, Naitung 27: U Bah Vincent H Pala MP jong ka Shillong Parliamentary Constituency u la ong ba ka sokar Meghalaya ka dei ban thug ia ka kynhun ban phah wad bniah ha kaba ia dei bad ka Inner Line Permit(ILP) bad kane ka kynhun kam dei ban don liang ha ka sain pyrthei, shuwa ban shim ia ka rai ban pyntrei kam lane ban kyntait ia ka. U la ong ka don ka NEHU lah ban aiti ha ka ruh.
Haba kren ha u SP News Agency ha kaba ia dei bad ka Inner Line Permit ka phang pdeng kaba ki paidbah bad ki seng bhlang ki ia kren bha ha kine ki sngi, u Bah Pala u la ong “ Ngan nym ong pyntrei kam ia kane ne kyntait ia ka, hynrei ka jingsngew jong nga shimet ka long ba ka sorkar ka dei ban thung ia ka kynhun ban jurip bniah ia kane ka kam ban peit ia ka jingbha bad ia ka jingsniew ka ban mih na ka shuwa ban shim ia kano kano ka rai”.
Ha ka juh ka por u la ong “ngi im ha ka ri synsahr paidbah ha kaba u ne ka briew ki don ia ka hok jong ki ban pynsngew ia kaei kaba ki don ban ong bad yn nym lah ban khang ia kata, hynrei kum ka sorkar kaba don ia ka jingkit khlieh ka dei ruh ban leh da ka jingkit khlieh haba ka shim ia kano kano ka rai kaba dei na ka bynta ka jingbhalang na ka bynta ka jylla.
U Bah Pala u la ong bay m dei ban shah ia ki briew ba kin shu wan ban ioh shong ha kane ka jylla Meghalaya don kam ia ki lad jingiada, hynrei ha ka juh ka por dei ban peit ba kita ki lad jingiada kim dei ban ktah ia ka roi ka par jong ka jylla bad ia ka ioh ka kot jong ki paidbah ha ka jylla.
Ka Inner Line Permit ruh ka don ka jingiadei bad ka rukom bat khyndew bat shyiap jong ki paidbah nongshong shnong ha kane ka jylla, u la kdew ba ha Garo Hills la ai pata da u Nokma , Ha Jaintia Hills la ai Pata da ka District Council, ha Khasi Hills la ai pata da u Syiem, LYngdoh, Sirdar.
“ Ngi im ha kane ka pyrthei kaba ki iew ki hat ha ka pyrthei ki la plie lut ia baroh, kaei kaba jia ha Ri Europe ka ktah ia ka Ri America kaei kaba jia ha India ka ktah ia kiwei ki bynta jong ka pyrthei bad kumta ter ter. Haba wan ha ka jylla Meghalaya, ha Garo Hills u bym dei riewlum ruh u long MDC, katba ha Khasi Hills bad Jaintia Hills tang ban thep vote ruh ym shah kine kiei kiei kiba hap ban peit bha” la ong u Bah Pala.
U Bah Pala, u la ban biang ba “ Ka jingsngew jong nga shimet hi halor ka ILP ka long ba hap ban don ia ka kynhun ban pule bniah ia kane ka bynta kaba khlem da don kano kano ka jingiadei bad ka sain pyrthei katba dang don ka jingiadei bad ka sain pyrthei yn nymlah ban ioh ia ka kaiphot kaba biang”.
U Bah Pala u la ong ba peit u Chairman jong ka committee kaba dei ia kane ka ILP u la rem ha ka election bad ki briew kiba la kyrshan ia ka ILP kim shym la jop ha ka election, u la ong ba u la shu ioh sngew ba ka la don ka kaiphot kaba la ai sha ka sorkar hynrei ym pat iohi ia ka.(SP News)
