Shillong, Naiwieng 12: Ka jingialang paidbah kaba la khot da ka seng FKJGP mynta ka sngi ha Mawkhar ha kaba la kyrshan da ki wei ki sengbhalang kum ka KSU, CSWO, SSSS, HNYF, RBYF bad kiwei kiwei ki dawa na ka sorkar ba dei ban pynshitom ia baroh kito kiba paw kyrteng ha ka jinglap jong ka CBI.
Ha kane ka jingialang baroh ki seng bhalang ki la pynpaw ia ka jingsngewbitar ka jong ki ha kaba ki nongmih khmat ki la leh ia kaei kaei kaba ym dei ban leh da kaba pynduh ia ka hok jong ki paidbah kiba dei ban ioh da kaba pynrung ia ki briew kaba ki mon.
Ha ka jingkren jong ka president jong ka CSWO, ka Kong Agens Kharshiing ka la ong ba na ka liang jong ka seng ka la dei ai ia ka FIR sha ki pulit ba ki dei ban kem ia kiba don kti ha kane ka kam khamtam ia ka Kong Ampareen Lyngdoh, kaba dei ka minister ha kato ka por.
Baroh ki nongkren ha kane ka sngi kyntup ia u Bah Daniel Khyriem president jong ka KSU, u Preisdent jong ka FKJGP U Bah Joe Marwein lem bad kiwei kiwei ki nongkren ka la pynpaw ba kane ka jingleh ka long kaba ym lah shuh ban mud dur ba ki nongmih khmat ki nud ban leh ia kane ka kam kaba ktah ia ka pule puthi jong ki samla ha kane ka jylla.
U Bah Willbert Ranee General Secretary jong ka FKJGP u la ong ba I mat ka la dei ka por ba ki nonghikai ha dien ba la dep ka exam jong ki khynnah ki dei ban leit rah ia ki jubab jong ki khynnah sha ki MLA ba kin korek maki namar ki kham stad ban ia ki nonghikai u la kynnoh.(SP News)
