Dei tang ki jingiasyllok kiba don jingmut ba lah ban weng ia ki jingeh: Dr Mukul

Shillong, Nailar 15: U myntri rangbah jong ka jylla u Dr Mukul Sangma ha ka jingkren ka jong u mynta ka sngi ha ka jingrakh ia ka jinglaitluid jong ka Ri India kaba 67^th u la ong ba  ki jingiaumsnam bad ki jingialeh markylliang ki pyndkoh ia ka jingkiew jong ka ri. Ha kino kino ki khep jong ka jingeh jingtynjuh, ka jingialeh markylliang kam dei ka jubab.

U myntri rangbah u  khot u wer ia ki  paid nongshong shnong ba ngeit skhem ba dei tang ki jingiasyllok kiba don jingmut kaba lah ban weng ia ki jingeh. Khlem ka jingsuk bad jingiatylli, ka jylla kan nym ioh ia u soh ka roi ka par.

Ka sorkar ka sngewthuh ia ki  mat kiba kongsan kum ka jingrung kyrthep ki mynder bad ka jingbuhai shnong beain bad ka jingiakajia khappud hapdeng ka Assam bad Meghalaya bad ki rai kiba mih nangta ki dang iai long ki mat bakongsan jong kane ka sorkar.

“Ngi lah ban iohi ia ki dak ki shin jong ka jingthrang ka sorkar ban weng ia kine ki jingeh da ka jingthung ia ki District Task Force ba la khlieh da ki Deputy Commissioner bad ka jingpynmih ia 39 tylli ki kam Labour Inspector, ka jingbuh ia ka Directorate of Anti-Infiltration, ka jingpyniaid ia ka National Population Register bad kiwei”.

Haba ia dei bad u pud u sam bad ka jylla Assam “Ngi la iaibteng ia ki jingiakren bad ka tnat Pohiing jong ka Sorkar India ban thung ia ka “Border Commission” ha kaba iadei bad ka kam khappud.

Ka sorkar Meghalaya kala lah ban phah ia ki kot ki sla kiba khlain sha ka Assam ban pynksan ia ki jaka ba ka la kam da ka sorkar Meghalaya. Kumta, la kyrpad ia ki paidbah ka jylla ba kin iai bat ia ka lynti ka synshar paidbah haba ngi jam shaphrang ban ioh ia ka roi ka par.

Ka shongsuk shongshngain ha ka jylla ha kane ka snem ka long kaba jaijai bad la lah ban teh lakam ia ka. Hynrei dang don  ki jingialeh kiba napoh kum ki kam pyntriem jong ki lehnoh kaba la ktah shibun ia ka shong suk shong shngain ha ki katto katne ki jaka jong ka jylla. Ka sorkar ka sngewthuh shai ia ki jingkitkhlieh bad kan pynbeit ia kine ki jingeh khlem randien.(SP  News)