Shillong Naiwieng 27: Namar ka jingkyrduh ki Khlaw Kynbat – ha ki thain Ri-Bhoi donkam ia ki tnad Forest & Environment, kynthup ia ka Meghalaya State Medicinal Plant Board, ban pyrkhat thymmai ban shim khia ban mang kyrpang ka jaka rep kynbat ha ki Khlaw Shimet, Khlaw Shnong, Khlaw Raid bad ki Khlaw Hima!
Ki nongsumar tynrai ki Doctor Sla kumba, 54 ngut na ki 23 Shnong, Lumdieng, Umpyrdong, Diwon, Sohtad, Umkon, Mawiong, Kuswai, Umjong, Iewmawlong, Umshaken, 20 mer, Umdap, Mawphrew, Umwang, Borkhatsari, Marngar, Umsakait, Umshit, Plasha Nongbah, Umlakhar, Nongkya, Nongpoh, bad Pahamsyiem, kiba dei ha ka kam sumar tynrai bad kiba ai dawai kynbat, kum ki nongpynkhakhun, ki nongkhem, ki ba long ruh ki dkhot ka SPIKAP, kiba ngi juh khot ki Doctor Sla, ban ialeh ia ka jingpang Khieshoh Rih (Malaria), hapoh ka jylla Meghalaya, ki la poi sha ka training bad awareness program ba la pynbeit da ka Futures Group International India Pvt Ltd, (Caritas-India), ha ryngkat ki bor jong ka tnad ka Koit ka Khia- (Khie Shohrih) -Malaria ( Dept of Health- Malaria) Govt of Meghalaya bad ka Society for Promotion of Indigenous Knowledge and Practices (SPIKAP), naduh por 9.30 mynstep haduh 2 baje janmiet, ha ka 27, tarik Naiwieng (November) 2013, ha Iing Dorbar Hall Nongpoh Proper, Ri-Bhoi District.
Kitei ki nongsumar tynrai, na ka thain Nongpoh, Umden, area na kitei ki 23 shnong, , ki la ioh ia ka jinghikai kaba shisngi halor kumno ban iarap bad ban ai jingmut ia kiba ioh ia kum katei ka jingpang Khieshoh Rih (Malaria) kaba long kawei na ki jingpang kaba ha Ri India dang khien ba ka long kawei na ki ba shyrkhei tam.
Ha ka jingiakren ki nong sumar tynrai ki la pynpaw ia ka jing sdang kyrduh jong u kynbat bad ki la kyrpad ia u Bah John F Kharshiing, kum u Chairman, ka Dorbar Khlieh Nongsynshar Ka Ri Hynniewtrep, ban ia kren bad ki bor Shnong, Raid bad Hima ban buh kyrpang ia ka jaka ban ioh rep ia ki kynbat kiba kordor jong ka thain Ri-Bhoi.
Ha katei ka jinghikai nalor ki Doctor na ka tnad ka Koit ka Khia, ki officer jong ka Futures Group International India Pvt. Ltd, bad ka SPIKAP, la ioh jingkren ruh na u Bah John F Kharshiing, Co-Chairman, Meghalaya State Planning Board, bad Chairman, (SPIKAP)Society for Promotion of Indigenous Knowledge and Practices, uba la ai khublei kyrpang ia ki Nongaidawai Kynbat/ Ki Nongkhem/ Ki Nongpynkhakhun kiba la kyrshan ia ka koit ka khia sha ki thain kyndon ia kiba duk kiba shitom, ha kaba ka jngai ka PHC ne CHC bad khamtam ki la long ka jingkyrkhu namar ka long kaba shitom ia ka Sorkar ban buh Doctor ne ki Nus ha man ka Shnong, bad u la ong ba lyngba katei ka jinghikai ka jingiasyllok training ki paidbah nongshnong sha ki thain kyndon, ki lah ban ioh ka jingbatai kaba bniah bad kaba shai kumno ban leh, bad hangno ban leit lada ki shem ia kum katei ka jingshitom bad haba ka jur katei ka jingshitom namar u kain pyrjong. U la ong ba katei ka program kan nang iaid shakhmat katkum ki program haduh ban da dep ai training ia baroh ki nong sumar tynrai ha kane ka jylla Meghalaya.
U Bah John F Kharshiing, Co-Chairman, Meghalaya State Planning Board, bad Chairman, SPIKAP, u la kyntu ia ki Nongsynshar Dorbar Shnong, Dorbar Raid bad Dorbar Hima ban shim khia ban pynlong ki jingiatai hapoh ki Shnong ki thaw ban ioh lad ban buh bad mang kyrpang ia ki jaka rep kynbat dawai ha ki Khlaw Shnong, Khlaw Adong, Khlaw Raid bad ki Khlaw Hima, kum shibynta ban iada ia kine ki kynbat kiba kordor ioh ba ki duh jait. U la ong ba ki sla kynbat khasi ki dei kiba bha tam ban na pdeng ki dawa.
Ha kane ka sngi la ioh jingkren na u Bah W Syiem, Sirdar Hima Nongpoh, bad ki Rangbah Shnong, Nongpoh Proper, bad kiwei kiwie ki Rangbah Shnong kiba la ai mynsiem ia ki nongsumar tynrai ba kin iaid shakhmat ha la ki kam ban iada ia ka mariang lyngba ka jingtrei shitom jong ki.(SP News)
