Shillong, Nailur 06: U myntri rangbah ka jylla mynta ka sngi ha ka jingialang paidbah ha Mairang ha kaba pli
e ia ka iing jong ka College Presbyterian Science College ha mairang, u la ong ba ka ILP kam dei tang ma ka lad ban iada na ka jingwan jong ki briew ba nabar hynrei dei ki kam kiba khlain kiba lah ban iada.
Halor kane ka jingiakhih kaba dang iaid mynta ha ka jylla na ka liang jong u myntri rangbah u la ong ba ki don kiwei ki lynti bad ki lad jingiakhih khlem da ktah ia ka roi ka par. U ong ba ki don ki ain kum ka Land Transfer Act, Tenancy Act bad kiwei kiba la don ka sorkar kan pynkhlian ia ki ban thwet ia ki nongwan rung tuh ha kane ka jylla.
Ki jingiakhih da kaba khot pakhang shnong bad khang ophis ka ktah ia ki kam pynroi ha ka jylla. Ban wanrah ia ka roi ka par dei tang ka jingshong suk bad ban leh ia kata don kam ia ka jingsuk bad kadei ka kamram jong u wei pa u wei ban pyrkhat ia kane.
Na ka liang jong u myntri rangbah ka jylla u la ai ka jingiaroh ia ki nongseng ia kane ka Science College ha katei ka jaka ba ki long shisha ki briew kiba la iohi jngai. Ka sorkar ka don ia ka thong ban pynshlur ia ki khynnah ba ki dei ban shim ia kane ka jingpule kaba kyrpangha ka liang ka science bad jingkhein khamtam eh ia kito kiba duna ha ka ioh ka kot namar ka jingduk jingkyrduh ba kim lah ban leit sha kiwei ki bynta jong ka jylla ban pule.
Ka sorkar ka ialeh katba lah ban ai ki jingiarap ha kaba tei ia ki iing ki sem na ka bynta ki smala pule, u la ong ba ka jylla ka la don kam ban don ia la ka jong ka Engineering College, Medical College bad ka sorkar kan ai jingiarap kyrpang ia ki ba pule ia ka science. Ka jylla ka don kam ban pynmih ia la ki jong ki briew ha kane ka bynta.
U Dr Mukul u la ong ba dei ban pynlong ia ka jylla kawei na ki jylla kiba kiew sha phrang bad ban pynurlong ia kane dei ban pynneh pynsah ia kajingshong suk, kiwei kiba la ia don lang ha kane ka sngi ki long u Chairman MGCC, u Bah R V Lyngdoh, MLA , u Bah Metbah Lyngdoh MLA ka Mairang bad u MDC u Bah R S Rani.(SP News)
