Shillong, Nailur 16: Donkam ka jingiatrei lang kaba jan hapdeng ki Doctor Kot ka tnad ka koit ka khiah (Dept of Health) bad ki Nongaidawai Kynbat/ Ki Nongkhem/ Ki Nongpynkhakhun kiba dei ki Doctor Sla ban ialeh ia ka jingpang Khieshoh Rih (Malaria), hapoh ka jylla Meghalaya.
Kum ka jingbteng ia ka training Maleria kaba dang iaid mynta, kumba palat 50 ngut Nongaidawai Kynbat/ Ki Nongkhem/ Ki Nongpynkhakhun, kiba long ki dkhot jong ka Society for Promotion of Indigenous Knowledge and Practices (SPIKAP), kiba hap hapoh ka Laitkroh C&RD Block ki la ioh ia ka jinghikai kaba shisngi halor kumno ban iarap bad ban ai jingmut ia kiba ioh ia kum katei ka jingpang Khieshoh Rih (Malaria) kaba long kawei na ki jingpang kaba ha Ri India dang khien ba ka long kawei na ki ba shyrkhei tam.
Ia katei ka training kaba shi sngi la pynlong ha Mawjrong ha ka 16 tarik September 2013, naduh por 9 baje mynstep haduh 4 baje janmiet, hapoh ka hall jong ka Laitkroh C&RD Block, East Khasi Hills District, ba la pynlong bad pynbit pynbiang da i Kong M Suhkhlain, M&E/MIS Officer, na ka Caritas India, Futures Group International India Pvt. Ltd, Society for Promotion of Indigenous Knowledge and Practices (SPIKAP) bad ha ka jingiadon ryngkat i Dr R Kyndiah, M&HO, i Kong T Mawniuh, Lab Technician, ki ba la wan ka tnad ka koit ka khia Dept of Health Sorkar Meghalaya, kiba la iarap ban pynshai halor katei ka phang Malaria.
Katei ka jinghikai ka la long kaba myntoi bha ia kitei ki Nongaidawai Kynbat/ Ki Nongkhem/ Ki Nongpynkhakhun kiba dei na thain Khadar Shnong, Hima Sohra bad kiba la wan na 13 tylli ki Shnong kynthup na ki Shnong Khongthong, Warwar, Khrang, Tyniar, Mawthawtieng, Pdei Puhbsien, Diengsong, Thangtim, Mawtongreng, Nongsteng, Nongbah Mawshuit, Nongtraw, bad na ka Shnong Wah Sohra.
Ha katei ka jinghikai nalor ki Doctor na ka tnad ka Koit ka Khia, ki officer jong ka Futures Group International India Pvt. Ltd, bad ka SPIKAP, la ioh jingkren ruh na u Bah John F Kharshiing, Co-Chairman, Meghalaya State Planning Board, bad Chairman, SPIKAP, ha kaba u la ai khublei kyrpang ia ki Nongaidawai Kynbat/ Ki Nongkhem/ Ki Nongpynkhakhun kiba la kyrshan ia ka koit ka khia sha ki thain kyndon ha kaba ka jngai ka PHC ne CHC bad khamtam ki la long ka jingkyrkhu namar kumba ngi tip baroh ka long kaba shitom ia ka Sorkar ba kan buh Doctor ne ki Nus ha man ka Shnong, bad u la ong ba lyngba katei ka jinghikai ka jingiasyllok training ki paidbah nongshnong sha ki thain kyndon, ki lah ban ioh ka jingbatai kaba bniah bad kaba shai kumno ban leh, bad hangno ban leit lada ki shem ia kum katei ka jingshitom bad haba ka jur katei ka jingshitom namar u kain pyrjong. U la ong ba katei ka program yn sa nang pynlong ha kiba bun ki jaka jong ka jylla Meghalaya.(SP News)
