Shillong, Nailar 05: Kum shibynta ban teh lakam ban ban tem noh ia ka jngkynrei ki kam kynnoh menaiksuid ne menshoshnoh ha kane ka jylla, Ka Meghalaya Peoples Human Rights Council (MPHRC) kum kawei na ki Seng kaba iaksaid na ka bynta ban iada ia ka Hok Longbriew Manbriew, ka dawa na ka Sorkar Jylla ba ka dei ban thaw noh da ka ain kaba kyrpang (Anti-Superstition Law) na ka bynta ban pynduhjait shisyndon ia ki kam kynnoh menaiksuid lane menshohnoh da ki riew shim kabu bad kiba ialam bakla ia ki paidbah tang na ka bynta ka jingmyntoi shimet.
“Kumba la paw ha kine ki khyndiat sngi la iohi ba ka jingkynnoh menaiksuid lane mynshohnoh ka la lam pynban sha ki kam thombor ia ka Hok Longbriew Manbriew bad ka jingthaw noh ia ka Ain bakyrpang da ka sorkar ka long kaba donkam, namar kum ka jaidbynnriew ngim pat lah ban pynkylla ia la ka rukom pyrkhat pyrdain jong ngi namar ba kane ka jingngeit ka dei kaba la don bad suhthied naduh hyndai hynthai” la ong u Bah Dino D. G. Dympep, Chairman ka MPHRC.
Haba kdew ba wat lada ka jingngeit tyrnrai ha kano kano ka niam ne ka dustur ka dei tang shibynta na ka Hok ba kyrpang jong man la ki nongshnong ia kaba la ai bad ba dei ban burom katkum ka Riti Synshar pyniaid Ri, hynrei ka jingpyndonkam bakla pat ia kane ka Hok la ka long ha kano kano ka rukom ka dei pat ka kam kaba long beain bad ka jingthombor ia ka Hok Longbriew Manbriew kabe dei ban ioh ia ki jingpynrem kaba jur na man la u nongshong shnong ong ka kyrwoh na ka MPHRC.
Namarkata ia kane ka rukom pyrkhat ne mutdur dei ban pynkylla thymmai noh namar ka ktah ia ka hok tynrai bad ia ka Hok Longbriew manbriew jong man la u nongshong shnong bad kaba donkam mynta ka long ba ka sorkar ka dei ban teh lakam noh shisyndon da kaba thaw noh da ka ain kyrpang ka ban iarap ia ki briew kiba lui lui bad kiba ngat ha kum kine ki jingshah kynnoh.
Kyntang iawai, namar ka jingbymdon ia ka Ain bakyrpang ka ban iada ia kum kine ki jingshah kynnoh ne ki jingshah pharep kulmar, Ka MPHRC ka dawa na ka sorkar ba ka dei ban thung noh shwa da ka kynhun iit bniah ka ban peit kyrpang ia kane ka kam bad ha ka kajuh ka por lada don ia kum kane ka kynhun dei ruh pan jingmut na ki paidbah halor kumno ban wanrah ia ka shongsuk shongsain bad ban pynduh jait ia kum kine ki jingmutdur ne jingkynnoh kiba khlem sabut.(SP News)
