Jowai, Risaw 03: Ka jaintia Youth Federation (JYF) Sengkmie ka pynrem jur ia ka jingmut jong u Myntri Rangbah u Dr. Mukul Sangma u ba long ka daw jong ka jingpakhang shnong, pakhang ophis bad pakhang surok da ki 10 Sengbhalang jong ka Jylla pyrshah ia ka sorkar hapoh ka jingialam jong u kum u khlieh jong ka sorkar, ha kaba ym don jingshaniah shuh ia ka jinglong ba ehrang bad eh dohnud jong u wat ban kit khlieh ia ka lawei jong ka Ri bad ka jaitbynriew rit pait.
Haba pule ha ki khubor man ka sngi kiba ai ka jingshakri kaba biang ban ioh jingtip kum ki paitbah nongshong shnong jong ka Jylla, la iohi ia ki jingbyrngem jong u myntri rangbah ba u la nang pyneh shuh shuh ban pyrshah ia ka jingiakhih ki sengbhalang halor ka nongrim ban dawa na ka sorkar ia ka hok ban ioh jingiada na ki jingwan tur khlem put da ki briew kiba na bar ban ioh longtrai ia ka khaii ka pateng, ka khyndew ka shyiap wat ha ki kam sorkar ter ter ka la long kumba buh ia ka jaitbynriew ha kliar synrang ong u bah P.Majaw President ka JYF.
Ka jingrai kop jong ka sorkar u Dr.Mukul Sangma ban ñion beit da ka aiñ pyrshah ia ki sengbhalang halor ka jingiaibteng jong ki ia ka pakhang surok miet, ka dei ka jingpynbor hi da ka sorkar ia ki Sengbhalang ban iakhih namar ka jinglong kuman jong uMyntri Rangbah kaba la sdang ban ai ding ia ka mynsiem ba shynrang jong ki nongialam sengbhalang ban pynibor ia ka sorkar.
Ka jingkren laplah jong u Dr.Mukul Sangma da ka ba ong ba ki sengbhalang ki la shim kabu na ka daw ym ju don ba pyntreikam ia ki kyndon jong ka aiñ ha ki snem kiba la lah ka dei tang ka khwan burom jong u Myntri Rangbah u ba shukam kulmar ia ka rukom pyntreikam ia ka ain, lada phai sha ka mynnor ha ki nongialam barim la iohi ba ki dei shisha ki riewshemphang kiba iar ka jingiatip lem bad don jingsngew ia ka iap ka im jong ka Jylla Meghalaya ba lada don kano kano ka jingiakhih jong ki sengbhalang ki kloi ban plie ia ka jingkhang ban wad ki lad ki lynti kumno ban wanrah ia ka hok khnang ban ioh kheit ia u soh jong ka jingkylla hynrei mynta ka kynti pat markhongpong ka Sorkar ka kwah pynbor pynban ia ki khun samla ban ia rah suloi bad rung khlaw khlem pat dei por.
Shuh shuh, ka jingsam M-TABs u Dr. Mukul Sangma Sa ki khynnah skul jong ka East Khasi Hills, ka ba la kot haduh T.20 klur na ka bynta ban ai sha ki 24000 ngut ki samla pule jong ka jylla kiba dang pule mynta ha ka Class XII, ka dei tang ka kam khwan burom ban pynbiej ia ki paitbah kiba la duh jingshaniah ia ka rukom long Myntri Rangbah jong u bad khamtam ba la jan ka samoi Election MP ong u bah Majaw.
Lada u Myntri Rangbah u lah ban thied M-TABs haduh T.20 Klur na ka bynta ki khynnah skul jong ka Jylla, kan eh aiu ia u ban pyntreikam noh ia ka Inner Line Permit ILP kaba long ka daw ia u ban ia khih ki sengbhalang jong ka Jylla kaba dang iaibteng haduh mynta mynne.
Kaba ithamula shuh shuh hangne ba ka sorkar lyngba ka police dept ki kloi bha ban kem ia ki dkhot ne nongialam sengbhalang khlem da pynslem lada don ba ujor FIR ia ki, kumjuh ban pynngat ha ki kyndon bapher bapher khnang ba kin dup resign ruh na ka jinglongdkhot bad nongkitkam sengbhalang, ka dei ka buit leh donbor ban pynjah noh ia ka hok jong ki nongiakhih paitbah ha ka Ri shynshar paitbah na ka bynta u paitbah.
Kaba pynsyier shuh shuh ia ki paitbah ha ka rukom shynshar jong ka ne ka sorkar kaba ialam da ka Congress ka dei ka jingpynslem bishar ia ka hok ha kaba la ujor PIL pyrshah ia ki 8 tylli ki cement company da JYF na ka bynta ban iarap ia ka sorkar ba kan ioh revenue da ki 1000 klur tyngka lyngba ka jingieng beain bad bym khein snep ki kharkhana pynmih dewbilat ha jaintia hills khlem da ioh jingbit na ka MoEF jong ka sorkar pdeng. Ka jingklun ki Karkhana dewbilat (cement Company) ia ka jaka khlaw jong ka jylla kaba la kot haduh 1800 hacter (18 square Kilometer) kaba la lap da ka Joint Inspection Team (JIT) kaba la thung da ka sorkar jylla lyngba ka hukum jong ka sorkar pdeng ki la leh aiu halor ka ne ka jinglap jong ki cement plan? Buh jingkylli u bah majaw.
Ka aiñ ka dei ban long solansar ia baroh, ym tang ia ki nongialam sengbhalang, lane ki duk ki suk ban kem katba mon hynrei ka Sorkar Meghalaya ka la pyntreikam hok shisha ia ka ain? Balei kam shym la kem ia ki tei ki heh cement company, heh pulit ba ia donkti ha ka case jong u fullmon, heh Sorkar kiba la iadon kti ha ka jingthung kam beaiñ ia ki nonghikai skul (illegal appointment of teachers), ka jingdie jaka beaiñ na ka bynta ka nongbah Shillong kaba thymmai (New Shillong), ka jingbam klop na ka skhim sam jingbam ia ki khynnah rit (ICDS) bad kiwei kiwei,” kumba la lap lyngba ka RTI jong ka CSWO.
Ka jingmynjur ka Ïing Bishar ba halor (High Court) jong ka Meghalaya ia ka jingkyrpad ka Sorkar ban buh noh da Ïing Bishar kaba kyrpang tang na ka bynta ban tian bishar ki nongialam bad ki dkhot jong ki sengbhalang kiba pynlong ia ka jingpakhang shnong, pakhang surok bad pakhang ophis kam dei ka jingkit khlieh ne jingshimkhia ia ka suk sain jong ka Jylla, hynrei ka dei tang ka kam arsap bad leh shilling khlem da thew pyrla bha ne pyrkhat sani ia ka jinglong ryntih ha ka synshar ka khaddar ha ka Ri shynshar paitbah la ong u bah Majaw President ka JYF.
Katkum ka jingiathuh u Dr. Mukul, ka jingpynshitom ia ki sengbhalang kiba dang bteng ia ki jingiakhih kan long katkum ba la bthah da ka Ïing Bishar kaba ha khliehduh (Supreme Court) jong ka Ri India, hynrei u Dr.Mukul Sangma u phah kem, u phah khang ne em ia ki tei ki cement company kiba la pynjot ia ka mariang ha sawdong sawkun jong ka, bad ka rai jong ka Ing Bishar ba hakhlieh duh (Suprem Court) ka ong ba kano kano ka kharkhana pynmih dewbilat kam lah ban tei beain ne pynieng beain khlem da ioh jingbit na ka MoEF Central. Ka sorkar Congress hapoh ka jingialam jong u Dr.Mukul Sangma ka leh aiu ia kine kine ki nong pynkhein ain kiba wan na bar ban kjit ia ka spah mariang bad spah khyndew jong ki Trai Ri Trai Muluk.
Kumta na ka liang jong ka JYF ka kyntu ia sorkar Meghalaya ba kan shimkhia ban trei hok ia ka kam kumba la kular hakhmat ki paitbah ha ka por election bad khamtam phi la dep ban bam smai ha shwa ba phin shong ia ka shuki nongialam ba phin trei hok bad trei khuid ban wan
rah jingkylla ia ka jylla, ym ban shim kabu ban shu kem ia ki nongialam jong ki sengbhalang hynrei to kem shwa ia kiba don hapoh sem lajong kiba dei ki nongtuh nong bamklop ia ka hok kiba duh ba rangli pynkut u kyrwoh na u bah P.Majaw President Jong ka JYF.(SP News)
