Ra
Shillong, K’lyngkot, 06: Ka Combined SC ka la khur ia ka nam lahduh ha ka Open To All Football Tournament ba la pynlong da ka Umrynjah Sports & Cultural Club, hadien ba ka la lah ban pynliem noh ia ka Nongrah SC lyngba ka tie-breaker 4-3 kol ha ka sngi nyngkong.
Ka jingiakhun ha katei ka sngi ka la long kaba itynnad bad kaba iakhaid bha ha kaba kine ki kynhun ki la iakhun tyngeh naduh kaba sdang. Ka Nongrah ka la ioh ban pynkhih jar nyngkong, hynrei ka jingtrei shitom ha ka kylla miet ka la pynlong ia ka Combined ban pynphai kylla ha ka kylla miet.
Haduh kaba kut ka jingialehkai kine ki kynhun ki la kut ha ka jingiakhaid. Na ka liang ki bor pyniaid ki la pyniakhun shwa ia ka ‘extra time’ kaba mar shiphew minit, hynrei kine ki kynhun kim shym la lah ban thep kol haduh kaba kut ka jingialehkai. Dei ha ka tie-breaker ba ka Combined ka la tam da 4-3 kol ia ka Umrynjah bad khur syndon ia ka jingjop.
Haba phai sha ka jingiakhun final jong ki kynthei, ka Mawsiatkhnam SC ka la khur ia ka jingjop hadien ba ka la pynliem noh ia ka Umrynjah SC da 1-0 kol.
Lyngba kane ka jingjop, ka Combined ka la khur ia ka song pisa kaba T. 13,000/- bad ka Nongrah ka la ioh T. 7000/-, katba ki ‘thei ialehkai ka Mawsiatkhnam ki la khur ia ka song pisa kaba T. 1000/- bad ka Umrynjah T. 500/- ba la sam da u MLA/MDC ka Mawlai Constituency Bah Embhah Syiemlieh kum u kongsan, ryngkat u symbud kongsan Bah Gervasis Kharmujai, uba long u kyrtong ban iakhun ia ka ilekshon MDC mynta u snem na ka seng United Democratic Party (UDP), ki riew rangbah jong kane ka klob lem bad ki riew paidbah katei ka thaiñ.
Ha kane kajuh hi ka sngi la sam ruh ia ki khusnam sha ki katto katne ki khynnah kiba pass bha ha ki eksamin bapher jong ki.(SP News)
