Tura, Kyllalyngot 05: Wat la ka election MP sha ka iing dorbar Lok sabha jong ka Ri Indian kan long ha u Iaiong bad Jymmang mynta u snem, ki paidbah jong ka Garo Hills haduh mynta kim pat tip mano kiban long ki kyrtong ha kane ka election ban wan.
Ki nongpeit pyrman kiba na Garo hills mynta ki pynsngew ba ki paidbah kim dang sah ha ka umdum namar ba kim pat shai mano ban ia khun ia kane ka election, na ka liang jong ka seng Congress kila bun palat kiba apply tiket na ka seng Nationalist People Party (NPP) kim pat pynshai mano ban ia khun ia kane ka election.
Ki khubor ki iathuh ba na ka liang jong ka MP ba mynta ka Agatha K Sangma kaba la jop na ka seng NCP haduh mynta kam pat kren ei ei la kan dang ialeh ne em ha kane ka MP election kaban wan bad ki wei pat ki tyllong khubor ki ong ba ha kane ka kynti kaba mynta un ia khun hi u Purno A Sangma president jong ka seng.
Kumba ka long mynta ha Garo Hills bun na ki MLA Constituency ki dei jong ka seng Congress, katba ka NPP kaba dei ka jong u Purno A Sangma ka la lah ban jop tang ar tylli ki MLA Constituency. Ka jingiakhun ha kane ka kynti kaba mynta kan long kaba kham itynnad ban ia ki por kiba la leit noh.
Kane ka election MP ha Garo Hills mynta kan kren ruh ia ka jingtrei kam jong kane ka sorkar Congress kaba la ialam da u Dr Mukul Sangma, ki paidbah ha ka MLA election ba la dep ki la pynjop bun ia ka seng Congress bad kyntait ia ka seng NPP.(SP News)
