Shillong, Nailur 25:Ki rawon kiba im ban kamai jakpoh na kam khwai ban 
pyndap ia ki jingdonkam ha iing, haba ki leit ban pynnoh ia u ryngwriang kim ju kham wanphai thylli sha iing bad don ki khep ba ki ioh pat da ki dohkha khyllah ki bym ju kham iohi khoit.
Kane ka la jia hynnin ka step sngi Hat Majai, ba u Bah Mathiius Lyngoh Lyngkhoi 38 snem karta, na ka shnong Umniuh Khwan ula ioh ia uwei udoh khyllah uba la ngat ha ka jar kaba ula pynap baroh shimiet ha kawei ka jaka ha pung Umiam kaba la tip ka Lumbulan kaba don hapdeng ka pung bad sdang ban jah noh noh ka jingtap ka um ha pyrshah ka shnong Umniuh Khwan bad ka Orchid.
Katei ka dohkha ka khia kumba shikilo shiteng bad ka jrong shiphut duna katba ka dur bad ka rong ka long kaba iphylla, ha kaba ki rawon bad ki riew tymmen kiba la leit peit hynne ka sngi Balang ha iingsah jong u bah Mathiuis (bah it) ki la pynpaw ia ka jinglyngngoh, ba kim ju kam iohi khoit ia kum katei ka jaiddoh ha ri lum Khasi Jaintia.
U Nongthoh Khubor uba la poi sha katei ka jaka ula I lyngngoh ba katei ka dohkha ka long rong ba thoh kum u khla bad ka met pat ka long kum u dohthli katba ka syntur ka ia syriem ia ki dohjei kiba shu snoh ha kynja maw.
“Ngam pat ju iohi kum kane ka jaiddoh,” ong u bah Mathiius bad bynrap ba katei ka doh kaba long kaba nep bha ka snep bad ka don ki kynja shiah jan baroh kawei ka met bad kaba phylla ka long ba lada ktah ia ka met ki kti ki dait.
Shuh shuh, kaba phylla ka long ba katei ka dohkha lada buh ha khyndew ka met kam kynduh ha khyndew bad shu shan da ki shnat kiba nep bad ka tdong, kum ka dur eroplain ba mut ba her.
Hynne ka sngi, bun ki paidbah na ki shnong ba marjan ki leit ban peit ia katei ka dohkha bad ki la ong ba ka long kum ka kha khla.
Na ka liang jong u bah Mathiius, ula pyntip ruh ia katei ka jingjia sha ka tnad kam ri dohkha ka jylla, ba kin wan peit ia katei ka dohkha kaba u la buh bha hapoh kawei byrti khnang kan ym iap.(SP News)
