Shilllong, Naiwieng 01: Ka iing bishar jong ka Guwahati High Court ha ka jingshong bishar ka jong ka ha ka 30 tarik risaw ha kaba ia dei bad ka kam thied khyndew ha ka shnong Umsawkhwankat kum ka Miss Case No(SH) 419 jong u snem 2012 Civil Rule In WP(C) No 299(SH) jong u snem 2012 na ka liang jong ka iing bishar ka la buh por biang ba ia kane ka mukotduma yn bishar biang haka 21 tarik mynta u bnai.
Ia kane ka mukotduma la ai da ka shnong Umsaw khwan bad u Bah Stanlywiss Rymbai Pyrshah ia ka sorkar Meghalaya, na ka liang jong ki nongmudui la ia said da ki hynriew ngut ki muktiar, kiba kynthup ia u Bah VGK Kynta, u Bah K. Wahlang, Bah RJ Nongbet bad R Thangkhiew bad u bah K Khonglah katba na ka liang jong ka sorkar la iai said da u Bah N D Shullai.
Ha kane ka jingiasiad hapoh ka iing bishar kaba don burom na liang jong u Advocate General jong ka sorkar Meghalaya u la ong ba ka jingsei ia ka pisa sorkar da ki nongmudui ka long kaba shu leh thok bad ka jingthied ia ka khyndew ha Umsaw Khwan ruh ka don ka jingartaien bad la ong ba dei ban pan ka jingpynshai na ki.
Na ka liang jong u nongbishar ba don burom u T Vaiphei, ha dien ba u la sngap ia ka jingiakren na ki arliang mamla u la ai por ia ka sorkar lai taiew ba kan ai ia ka dorkhas pyrshah ia ki nongmudui bad la buh por ba ia kane ka kam ym bishar biang haka 21 tarik mynta u bnai.
Katba kane ka kam ka dang sah ha ka jingbihsar ia ki rai kiba la pynmihha ka 8.10.2012 bad ha ka 15.10.2012, la buh teng shuwa.
Ban shu pynkynmaw ba kane ka mukotduma ka long halor ka jingshah kynnoh ba ka la don ka jingialeh bakla ha kaba thied ia ka khyndew ha kaba ka sorkar ka la kwah ba ka shnong bad u bah Stanlywiss Rymbai ki dei ban pynphai noh ia ka pisa kaba dei ka jong ka sorkar.(SP News)
