Shillong, Nailur 30:Ka seng Hynniewtrep Achik National Movement (HANM) kala ong ba kan pynlong ia ka jingiakhih da kaba shong kyllain mungor hakhmat Main Secretariat ha ka sngi Balang mynta ka taiew, kata ha ka 3 tarik u Risaw kum ka dak ka jingpyrshah ia ka sorkar halor ka jingkem khlem nongrim ia ki lai ngut ki nongialam ka seng. Katei ka jingshong kyllan mungor ka kan sdang naduh ka por 10 baje mynstep haduh 3 baje janmiet.
Ha ka khubor kaba la phah da u u Assistant General Secretary, Bah Damonmi S.Dkhar ula ong, “ngi la dawa na ka Sorkar ba ka dei ban pyllait noh mardor ia ki nongialam ka seng khlem kino kino ki jingteh kyndon hapoh 48 kynta, hynrei ka sorkar ka la sngap mynthi ia ka jingdawa kumta kim ban se ban shim ia kane ka sienjam, namar ka jingkem jong ki pulit ia ki dkhot ka seng kiba la pyllait noh bad ia ki heh Nongialam ka seng khlem kano kano ka daw.”
“Ngi kyrpad ia ki nongialam bad ki dkhot jong ki District bad ki Circle ba kin wan iashim bynta ha katei ka sngi,” u la ong. Ha kajuh ka por ka HANM, Mylliem Zone, ka la pynrem jur ia ka tnad pulit kiba la kem ia ki dkhot ka seng bad set along haduh mynta ia ki nongialam ka seng da kaba kynnoh ba ki donkti ha ka jingthang ophis.
Ka Seng ka pynrem jur ia ka jingkynnoh u Dr. Mukul Sangma, Myntri Rangbah ka jylla ba ka jingiakhih jong ki sengbhalang ka dei ka kam ki lehnoh. Ka Seng ka ai jingkyrshan pura ia ki 10 tylli ki sengbhalang kiba dawa ia ka hok jong ka jaidbynriew, la pynkut ka kyrwoh lyngba u Bah D Thabah, Organising Secretary, ka Mylliem Zone.(SP News)
