Shillong Naiwieng 24: Hadien jong ka jingiakhih ki sengbhalang kab
a la jan kynjoh sha ka 3 bnai kynthih, ha ka sngi saitjain kine ki nongialam kila iakynduhlang bad da kawei ka sur kila rai ban leit sha u paidbah ha kaba yn pynlong ia ka jingialang paidbah ha ka 30 tarik mynta u bnai ban pynsngewthuh khambha shuh shuh halor kajingdawa ia ka Inner Line Permit (ILP).
“Ki sengbhalang mynta ka kynti kin nym buh ia ki prokram jingiakhih hynrei kin pynlong da ka jingialang paidbah ha ka 30 tarik u Naiwieng ha ka por 11 baje mynstep bad ia ka jaka ban pynlong ia kane ka jingialang yn sa pynbna kham hadien” la ong u General Secretary ka KSU u samla Auguster Jyrwa.
Une u Nongialam ka KSU ula ong ruh ba ha kane ka jingialang ki nongialam jong ki sengbhalang kin pynsngewthuh ia ki paidbah halor ka ILP kaba dei ka ain kaba khlain kaba iada ia ka jingwan rung kyrthep ki mynder ri bad ki bar jylla.
“Ngi sngewthuh ba dei tang ka ILP ka ain kaba paka ban iada bad long kum u lakam ba skhem ban khang ia ka jingwan rung laitlan bad ka jingthmu ban wan shong buhai shnong ki bar jylla bad ki mynder ri kaba long ka jingma bad ka jingmynsaw ia u trai ri trai muluk bad ia ka jylla hi baroh kawei” la ong u Auguster Jyrwa.
Shuh shuh ula ong ruh ba ka nongrim ki sengbhalang kam shym la kylla bad ki iengskhem hala ka nongrim ba ka sorkar kadei ban pyntreikam noh ia ka ILP ha ka jylla bad ki sengbhalang ki khot ki wer bad kyrpad ia baroh ki dkhot ka jaidbynriew, ki dkhot jong ka jylla, ki paidbah, ki nongialam shnong ha sor bad khap sor bad ha baroh kawei ka jylla ban ia mih ryntih ha katei ka sngi ban wan ha ka jingialang ha kaba ki nongialam sengbhalang kin mih paidbah ban ai ka jingkren halor ka mat jingdawa jong ki sengbhalang.
Ha kaba iadei bad ka jingtar ki samla pule ia ka Meghalaya Regulation of Landlords and Verification of Tenants Bill 2013 ne ka Tenancy Bill, u samla Auguster Jyrwa ula ong ba ka jingtar ki samla pule ia katei ka bill ha ka jingialang wer jingmut kaba la pynlong da ka sorkar hapoh ka jingialam u bah Prestone Tynsong, ki samla pule kila leh ia kaba dei eh bad ka pawshai ba ka tenancy bill kadei ka ai kaba khlem bniat bad ka bym shym la kren eiei halor ka jingwna rung kyrthep ki mynder ri bad ki bar jylla.
Une u Nongialam ka KSU ula ong ruh ba ki samla pule kila shem ba katei ka ain kam lah ban iada na ka jingwan rung laitlan ki mynder ri bad ki bar jylla, hynrei ka long pynban ka jing pynsajia ia u trai ri trai muluk bad ka pynduh noh ia ki iktiar jong ki Dorbar Shnong.
“Ki samla pule kila leh ia kaba dei eh bad ka long ruh ka khubor kaba bha tam ia ka sorkar ba kadei ban kylla kaba mut noh bad kadei ban bret noh shi syndon ia ka Tenancy Bill, kam don jingmut ia ka sorkar ban pynlong ia ki jingialang wer jingmut bad ki samla ha katei ka sngi kila ai ia ka khubor kaba shai kdar ia ka sorkar ba kadei ban pynduh pyndam noh ia ka jingthmu ban pynkylla ain ia ka Tenancy Bill namar ka sorkar kala shu leh kyrkieh bad matlah bad kam shym la kren eiei hapoh katei ka Bill ha kaba iadei bad ka jingwan rung kyrthep ki mynder ri bad ki bar jylla” la pynkut u samla Auguster Jyrwa.(SP News)
