Shillong, K`lyngkot, 20: Ka 1st Annual Meet jong ka Synjuk ki Seng Rangbah Katholik Zone-IV kiba hap ha ki hynniew tylli ki Parish jong ka Shillong Archdiocese kaba la long san sngi kynthih ha St. Joseph’s Church, Mawkhar Parish, Shillong ka la kut noh hapdeng ka jingshongkun shongblei. Ka phang pdeng ha kane ka lympung ka long ‘Ki longiing longsem’ kaba long ruh ka phang puson jong ka Shillong Archdiocese mynta u snem. Kane ka lympung ka la sdang naduh ka sngi balang jong ka taiew baladep lyngba ka jingduwai pynkhreh (Tridum) kaba la kut ha ka sngi Thohdieng.
Ia ka lympung la bteng biang ha ka sngi saitjaiñ ha kaba la pynher ia ka lama da u Bah A.L Hek, Myntri ka tnat ka Koit ka Khiah ka Sorkar Jylla uba la long u Kongsan, ha ryngkat ka jingiadon lang ruh u Rev. Fr. Michael Marbaniang, Parish Priest ka St. Joseph’s Church bad ki rangbah nongmihkhmat kiba la wan na kine ki hynniew tylli ki Parish. La pynbud ia kane ka lympung da ka seminar ba la ai jingkren da u Rev. Fr. Wilfred Kharpuri, SJ ha ka kylla step bad ha ka kylla miet.
Ia ka lympung la bteng biang ha ka sngi u Blei lyngba ka jingkren bad ka jingiaphylliew jingmut halor ka phang puson ‘Ka Ing ka Sem Khristan,” ba la ai da u Rev. Fr. Jose Varrikasseril, Sdb.
Ki Rangbah kiba la wan ban iashim bynta ha kane ka lympung ki la ioh jingmyntoi shikatdei eh ha kine ki jingiaphylliew jingmut bad ha jingialang pynkut ba la ai da u Rev. Fr. Norbert N. Nongrum, halor ka phang, “Ki Rangbah bad ka Longing Longsem,” uba la batai bniah bad pynsngewthuh ia ki longkpa ba kin don ka jingkitkhlieh kaba janai ia ka ing ka sem ban ialam lynti ia ki khun sha u Blei bad ka deiti jong u Rangbah ia la ka iing ka sem, ka imlang ka sahlang bad ka Balang.
La pynkut ia kane ka lympung da ka jingpynhiar noh ia ka lama bad ki kyntien kyrkhu kyrdoh na u Rev. Fr. Michael Marbaniang uba long u Spiritual Director ka Synjuk bad hadien kane la aiti ia ka lama sha u President ka Zone-IV, jong ka Seng Rangbah, St. John’s Church, Laban Parish.(SP News)
