Shillong, Jylliew 03: Mynta ka sngi ka la don ka jingialang kaba kyrkieh hapdeng ki Border Security Force (BSF) badki Border Guard of Bangladesh ha rud jong ka wah Umngot ha Dawki ha ka kyrdan jong ki DIG kane ka jingialang ka la pynkyndit ia ki nongshong shnong jong ka Dawki hi baroh kawei.
Na ka liang jong ki BSF haba kren ha u SP News Agency ki la ong ba kane ka jingialang kam dei kaba la pynlong kyrkieh hynrei ka dei kaba la dep buh lypa bad ka jingialang ka long hapdeng ki Sector commander jong ka Jowai bad Sector commander jong ka Shylet na ka liang jong ki BGB.
Kane ka jingialang ka long ban ia kren ia ki kam kiba ia dei hapdeng kine ki ar tylli ki Ri ka India bad ka Bangladesh. Ha kane ka jingialang na ka liang jong ki BSF ki la ong ia ki BGB ba ki don ki lehnoh Hynniewtrep National Liberation Council (HNLC) ha Bangladesh kiba rih tngen ha ka ri jong ki.
Ha kane ka jingialang la ong ruh ba ki BSF ki la ong ia ki BGB ba kim dei ban shah ia ki briew jong ki ban wan tam maw ha wah Umngot na ki bynta jong ka Ri India. La ia kren ruh ia ki kam khaii tuh ha kane ka jingialang kaba mynta ka sngi.
Na ka liang jong ki BGB ki la ban jur ba ki BSF ki die ba peit bha ba ki nongkhaii ia ki jingpynbuaid phynsedly kim dei ban iohlad namar kane ka jingdih ka rung na kane ka jylla sha Bangladesh ka long kaba jur bha. Ha kane ka jingialang na baroh ar liang ki la ia mynjur ban ia treilang ban khanglad ia ki kam khaii tuh bad kiwei ki kam beain.(SP News)
