Shillong, Rymphang 19: U kyrtong MDC na ka seng Congress u Dr Adviser Pariong, u la kyrpad ia ki paidbah ka MDC Constituency Nongstion ban ai lad la ia u ban mih khmat kum u MDC na ka seng Congress khnang ba un lah ban iarap shuh shuh na ka bynta ka bha ka miat jong ka thain west khasi hills district.
U la ong ba kan long ka lynti kaba bha ia ki paidbah jong ka thain Nongstoin lada kin ai lad ia ka seng Congress khnang ba kin ioh ia u briew uba sngewthuh ia ki jingeh jong ki paidbah.
La ioh jingkren na u rangbah nongialam HSPDP u Bah Tarsius Mawlot, nongkyrshan ba rad bah jong ka HSPDP uba la rai bad ki nongkyrshan jong u ban kyrshah tylli ia u Dr Pariong u kyrtong MDC na ka seng Congress. La ioh jingkren ruh na ki nongialam jong ka seng UDP kiba la mih noh bad rai kyrshan ia ka Congress ha kane ka District Council Election.
Na ka liang u Bah John F Kharshiing, u la ong ba ha west khasi hills district ki don san tylli ki seat MDC bad khlem artatien ba mynta ka kynti ki paidbah kin kylla thiah kylla dem ban jied ia u ‘channel’ uba biang sha ka Sorkar Jyllla, namar kumba ka long mynta don kam ki MDC kiba shemphang bad kiban don ka jingiadei bad ka lynti sha ka Sorkar Jylla.
U la pynshai bad ong ba kita ki jingpyntieng bad ki hukum kiba wan na u DC halor ka jingpyntreikam ia ka Green Tribunal, ki long ki order kiba bthah da u briew bad kam don ka jingeh ban pynbeit ia katei ka Ain lyngba ki Nongmihkhmat na Delhi bad na ka Sorkar Jylla.
U la ong teng teng ki hukum ka Supreme Court ki long tang ki Ain kiba shna da u briew, u nongbishar ruh bun kiba na bar bad kumta ka shitom ia ki ban sngewthuh ia ki Riti Kr Dustur, jong ka Ri bad ka Jaidbynriew.
Ha kajuh ka por u la ai khublei ia ka Hima Nongstoin ba ki long kawei na ki Hima kaba la thaw bad pynlong ain (Act bad ki Rule) ia ki Riti ki Dustur jong ka HIma Nongstoin naduh u snem 2006. Ki lad jingiada ia ka iit ka Hima bad ki khun ki hajar ki long lyngba kitei ki Act ki Rule ba la pass da ka District Council bad kiba la pynskhem da ka Sorkar Jylla.
U la ong ruh ba ka dei ka Seng Congress kaba lah ban ai ka jingshakri kaba skhem katba lada phai sha ka history jong ki District Council ha Meghalaya, kin lap ba ki Executive Committee, District Council bun sien ki khyllem noh bad kim juh neh.
Kiwei kiba la ia kren ki long i Dr E Lyngdoh, bad kiwei kiwei ki rangbah jong katei ka thain.(SP News)
