Shillong, Naitung 30: Ha ka sien kaba nyngkong eh hapoh ka jylla Meghalaya ioh jinghikai haduh 44 ngut ki Nongaidawai Kynbat/ Ki Nongkhem/ Ki Nongpynkhakhun kiba dei ki dkhot jong ka Society for Promotion of Indigenous Knowledge and Practices (SPIKAP), jong ka thain Umsning C&RD Block, Ri-Bhoi District, halor ka jingpang Khieshoh Rih (Malaria), kumno ban iarap bad ban ai jingmut ia kiba ioh ia kum katei ka jingpang kaba long kawei na ki jingpang kaba ha Ri India dang khien ba ka long kawei na ki ba shyrkhei kam.
Ia katei ka training kaba shi sngi la pynlong ha ka 23 July 2013, arphew ar ngut (22) bad mynta ka sngi 29 tarik July 2013, arphew ar ngut (22) hapoh St Michael Hr. Sec. School, Umsning, Ri Bhoi District, ba la pynlong da ka Caritas India, Futures Group International India Pvt. Ltd, ka SPIKAP bad ki officer ka tnad Health Sorkar Meghalaya, kiba dei peit ia ka Malaria.
Katei ka jinghikai ka la long kaba myntoi bha ia kitei ki Nongaidawai Kynbat/ Ki Nongkhem/ Ki Nongpynkhakhun kiba dei na Mawhati bad Umroi area bad ki dei ki nongsumar kiba na ki 18 tylli ki Shnong kiba jngai na ki PHC ne ki CHC.
Ha katei ka jinghikai nalor Doctor na ka tnad ka Koit ka Khia, ki officer jong ka Futures Group International India Pvt. Ltd, bad ka SPIKAP, la ioh jingkren ruh na u Bah John F Kharshiing, Co—Chairman, Meghalaya State Planning Board, bad Chairman, SPIKAP, ha kaba u la ong ba lyngba katei ka training ki paidbah nongshnong sha ki thain kyndon, ki lah ban ioh ka jingbatai kumno ban leh, bad hangno ban leit lada ki shem ia kum katei ka jingshitom bad haba ka jur katei ka jingshitom namar u kain pyrjong. U la ong ba katei ka program yn sa nang pynlong ki kiba bun ki jaka jong ka jylla Meghalaya.(SP News)
