Shillong, Nailar 15: “Paralok, nga sngewbha ruh ban pynbna ba ngi la tyrwa ban pyntreika
m ia ka skim shna iing kaba thymmai ba la tip kum ka “Meghalaya Affordable Housing Scheme” ha kaba ka sorkar kan pynshna ia ki iing na ka bynta kito ki longing kiba duna ka ioh ka kot”. Kane ka dei ka jingkren u Dr Mukul mynta ka sngi ha Madan Polo.
Kane ka skhim kaba thymmai kan mih bujli noh ha ka jaka jong ka Rural Housing Scheme. Hapoh ka skim kaba thymmai, yn shna ruh ia ki iing wai na ka bynta kiba rit tulop bad kiba duna jingmih khnang ban pynbiang jaka sah ia ki nongtrei sorkar.
Ha kaba ia dei bad ka jingnang kiew ka jingbanbor bad kam be-ain pyrshah ia ki kynthei bad ki khynnah ka la pynkthang mynsiem ia ka sorkar bad ia ka imlang sahlang baroh kawei. Kane ka pyni ia ka jingnang hiar dor ka tipbriew tipblei bad ka jingiatiplem ha ka imlang sahlang.
Na ka liang ka sorkar, ka la shim ia ki lad ban teh lakam ia kane da kaba ka la buh ia ki kashari kiba kyrpang ha ki sawtylli ki distrik headquater, kata, ha Shillong, Tura, Jowai bad Nongstoin bad ruh ia ki nongiasaid ain kiba kyrpang ha kine ki kashari. La buh ruh ia ki Police Station kynthei.
Ka Meghalaya, ryngkat ka jingdon ia ki briew kiba tbit bad ka spah ka mei mariang, ka don ia ka thong ban poi sha ka lawei kaba phyrnai. Nga shim ia kane ka kabu ban ai khublei ia ki paidbah jong ka jylla kiba la trei shitom ban ioh sha ka roi ka par.
“Ngi dei ban pynpaw sha ka pyrthei ba ngi don ka jingstad ban kner kti ia ki kabu bad ba ngi lah ban pyndonkam ia ki jingdon jingem jong ngi ba kin long ka spah bad ka kabu ioh kam khnang ba ka jingim jong ngi kan kiew shaphrang.”
Ha kane ka sngi u myntri rangbah u la kdew ia shibun kiba ka sorkar ka don ban leh na ka bynta jong ki paidbah ha ki liang baroh, kum ka nuksa ka rep ka riang, ka pule puthi ka koit ka khiah bad kiwei kiwei dei ki kam kiba ka sorkar ka don ban leh.
U myntri rangbah u la kyntu ia ki paidbah da kaba ong “ To ngin kular ba ngin kynmaw ym tang ia ki hok jong ngi hynrei ruh ba ngin pyndep ia la ki kamram bad ki jingkitkhlieh da ka jingmut kaba skhem, da ka jingtrei shitom bad da kaba hok khnang ba ngin ioh ia ka imlang sahlang kaba phyrnai bad kaba kiew shaphrang.(SP News)
