Shillong, Naitung 17: Ka jaid bynriew khasi mynta ka sngi sa shisien ka la rakhe pyndon burom ia ka sngi iap kaba 178 u khlaw wait ka jaid bynriew u Tirsot Sing Syiemlieh ha ki bynta bapher bapher jong ka Ri Khasi. Bad ki kyntien khatduh jong u tei u syiem ka hima nongkhlaw ka long “ Bha ba iap kum u syiem ban ia ba long syiem kum u mraw”
Ka Hima Nongkhlaw mynta ka kynti ruh ka la rakhe ia kane ka sngi da ka jingialang paidbah ha Madan Tirot ha Mairang. Ha kane ka sngi baroh ki nongkren ki la phai tang ha kawei ka bynta ban budien ia ka nuksa jong u tei u reiw khraw ka Ri.
Kane ka jingkren u Bah John F Kharshing ha ka sngi rakhe ia ka jingdap 178 ka sngi iap u khla wait ka Ri Khasi u la ong ba ha ka snem 1829 u Syiem Tirot Sing u la ia khun pyrshah da ka wait bad ka stieh ban ia da ia ka jaidbynriew, hynrei mynta ka dei ka por ban ia khun da ka ain ban iada ia ka jaid bynriew.
Ha kane ka nongbah Shillong ka seng BJP ka la pyndon burom ia une u riew khraw da kaba leit ban buh ia u Syntiew ha u Mot ba la tei na ha ka kyrteng jong Tirot Sing ha State Central Library, Ka seng Samla pule ka KSU bad kiwei kiwei ki seng bhalang ki la leit ban buh syntiew ha Tirot Sing Indoor Stadium ban burom kyrpang ia u ne u khla wait ka jaid bynriew.
Ha Hima Nongkhlaw ka la don ka jingialang paidbah ruh ha ka shnong Nongkhlaw ka jaka kaba u Syiem Tirot Sing u Shong u Sah ia kane ka jingialang la pynlong da ki seng bhalang ban pyndon burom kyrpang ia u ne u riewialeh laitluid jong ka Ri Khasi na ka kti jong ki phareng.
Ha kane ka sngi ka Association of Taeknondo Martial Art (ATMA) ka la pynlong ia ka jingrakhe ia kane ka sngi kynmaw burom ia u khla wait ka Ri Khasi ha R B Annupchand Hindi High School ha Keting Road, ha kaba baroh ki jaid bynriew ki la ia don lang ha kane ka sngi.
Ha ka jingkren jong u Bah Paul Lyngdoh MLA jong ka Shillong West u la ong ba ha ka jingkynmaw ka jong u ba kane ka dei ka sien kaba nyngkong ba ia kane ka sngi la rakhe da ki jaid bynriew baroh kiba don ha kane ka nongbah Shillong. U la ong ba ka jingeh kaba khraw tam kaba don ha pdeng ka long ka jingbym ia tip kawei ka jaid bynriew ia ka wei pat.Kiwei kiba la kren ha kane ka sngi ki long Dr Jemino Mawthoh MLA ka Nongthymmai, u Bah Sanbor Shullai MLA jong katei ka jaka bad u Bah A L hek MLA jong ka Pynthorumkhrah.
Ha ka jingkren jong u O P Agarwal ula ong ba kam biang tang ban ai shuti ha kane ka sngi, hynrei ka sorkar lyngba ka Education Department ka la dei ban pynrung kyrpang ha ki kot pule shaphang ki riew khraw jong ka jylla Meghalaya khnang ba ki khynnah skul kim ia pule ban tip ia ka jinglong riewshlur jong ki nongialam ba mynshuwa ha kaba ki la nud ban ia khun pyrshah ia ka hima Bilat.(SP News)
