Shillong, K’Lyngkot 11: Katba ka ilekshon sha ka Ïingdorbar Thawaiñ ka jylla ka la nang jan, kiba bun ki paidbah ruh ki la sdang ban shongshit. La iohi ruh ia ka lyer ilekshon kaba la sdang ban beh ha man la ki konstitwensi hapoh ka jylla, ha kaba na ka liang ki kyrtong ruh ki la nang ïai pynkhreh shait shait bad ruh ba ki la sdang ban bunkam bha.
Haba phai sha ka konstitwensi ka jingiakhun kaba kham itynnat bad jwat bha kan long hapdeng u MLA ba mynta u Bah Ardent M Basaiawmoit pyrshah ia u Bah Lambor Malngiang uba long ruh u MDC ka thaiñ. Ki kyrtong kiba la don jingthmu ban miih madan na katei ka constituency ki kynthup ia u Bah Draison Kharshiing na ka UDP.
Ha ka thaiñ Laitkor ki la pynpaw ba ka jingialeh hi kan long beit hapdeng u Bah Ardent pyrshah ia u Bah Lambor Malngiang. Katba sha ki thaiñ Smit, ka kham sawa ka kyrteng u Bah Ardent ha kaba ki paidbah ki la pynpaw ba kumba ka long mynta, te kham khlaiñ hi une u MLA uba mynta. Hynrei sha ki thaiñ Nongkrem Proper pat la iohi ba kham khlaiñ ka Kti u Bah Lambor, ha kaba ki paidbah ki la pynpaw ba ha kane ka kynti ka jingjop kan leit sha une u MLA barim naba haba ianujor ia ki jingtrei kam, ki kham lah hi jong u Bah Lambor.
Katba ha ki thaiñ Madanrting ruh la iohi ba hangne ruh la kham ioh bor u Bah Lambor uba la sdang ban suhthied bha ha ki paidbah, khamtam lei hadien ba u la ioh ia ka tiket na ka seng Congress bad kumta ka jingkyrmen ka kham noh sha une u rangbah. Kumjuh ha ki thaiñ Pomlakrai ruh ka jingiaknieh ka long hi hapdeng kitei ki ar ngut ki kyrtong.
