Shillong, August 08: U Bah Tony Thabah rangbah shnong barim jong ka Umsaw Mawjynrong ha ka jingujor kaba u la ai sha ki pulit jong ka Mawlai u la ong ba ha u snem 2011 u la shah rah sha Mawiong bad ha katei ka jaka u la shah byrngem ha u Bah Arnesson Dkhar ba lada ym soi ia ki kot pata yn ngat ha ka jingeh kaba khraw.
Ha kane ka jingujor sha ki pulit la ong ba ia ki kot pathok u la soi ha ka kyrteng jong kawei ka kong kaba la tip kum ka kong Sivia Nongrum. Ia kane ka jingbyrngem la ong ba la leh da u Bah Dkhar bad ki paralok jong u.
Ha ka juh ka por na ka liang jong ka kong Wistilian Sohtun ka la ai ka jingujor sha ki pulit jong ka Laban Police Station ba ha ka 31 tarik jong u Naitung ka la ia kut bad u Bah Arnesson Dkhar ba kan thied ia ka jaka kaba don 44,000 sq phut ha ka dor T.48,40,000/- tyngka bad ka la ai boina T. 6 lak sha u tei u bah bad ha dien ba ka la peit bha ia ki kot ki sla pata jaka ka shem ba ki dei ki kot thok.(SP News)
