Shillong, Nohprah 26: Ka kommitti kaba dei bad ki jingshna jong ka sorkar ia kaba la tip kum ka “ Public Undertaking “ ha kaba u bah S Nongrum u long u Chairman jong kane ka Committee u la leit rah hapoh ka iing dorbar jong ka jylla ha kaba ia dei bad ka jinglap ka jong ka halor ka Crowbrough Hotel kaba don ha khyndailad ia kaba la sdang naduh u snem 1987.
Ka Meghalaya Tourism Development Corporation ha dien ba kam shym la lah ban pyndep ia ka jingtrei na ki daw kiba bun ka la tyrwa noh ban aiti sha ki riew shimet ban pyniaid ia kane ka Hotel ia kaba la sah tyngkreng mynta la bun bun snem.
Ha kane ka jingkhot tender ki don saw tylli ki riew shimet kiba kwah ban shimwai ia kane ka iing jong ka sorkar bad kita ki long , M/s Lessly Shylla, H M Cement, Centre Point Groups Enterprise bad ka City View Hotels.
Napdeng jong kine kaba la tyrwa tam dor ban siew sha ka MTDC ka dei ka M/s Lessly Shylla ha kaba ka la tyrwa ban ai sha ka MTDC haduh 98.89 klur ha ki 33 snem kiban sa wan. Ia kane ka jingiasoi hapdeng ka MTDC bad kane ka kynhun la sakhi da u Victor B Lyne na ka liang jong ka MTDC bad ia ka M/s Lessy Shylla la sakhi da u bah Vincent H Pala.
Ha kane ka kaiphot kaba la phah sha ka iing dorbar na ka liang jong ka Committee ka la ai jingmud sha ka sorkar ba ka dei ban bthah ia ka M/s Lessly Shylla ba ka dei ban pyndep ia ka jingtrei hapoh u Nailar 2013 bad lada kam lah ban pyndep ka MTDC ka lah ban shim ia kano kano ka rai katkum ki kyndon kiba la ia soi.(SP News)
