Shillong, Jylliew 20: Ka kynhun ki seng bhalang bad ki 20 tylli ki shnong na ka thain diengphatsoh kila pynpaw ba ka jingkren jong ka myntri ba dei peit ia ki kam pynroi sor ba ka jingiakhih ka dei da kaba shah ialam ha ki seng bhalang ban dawa ban sangeh noh ia ka jingshim jaka ka long kaba bakla.
Ki seng bhalang kiba kynthup ia ka CSWO, TUR, FKJGP, KSU, KWADA ryngkat bad ki 20 tylli ki shnong ki ia long kawei la ong ka kong Angela Ryngad bad ka la ong ba wat u Lyngdoh jong katei ka jaka ruh u la mih madan ban pyrshah ia kane ka jingkwah jong ka sorkar namar kane ka jingshim jaka ka long pyrshah ia ka riti ka dustur.
Kane ka jingong jong ka myntri ba ka don ka jingipher jingmud ka long kaba la bakla namar ha ka 4 tarik mynta u bnai ki la dep ban ai da ka jingthoh sha ka sorkar ha kaba ia dei bad kane ka kam. Kumba ka long mynta katkum ka jingkwah jong ka sorkar ka long ban shim jaka shuh palat hynniew klur phut ka jaka. Kane ka jingshimjubor kan wanrah ia ka jingjynjar ia ki paidbah.(SP News)
