Shillong, Jylliew 12: Wat ha dien ba la don ki ain kiba pyrkhing ha kaba u Labour Commissioner u la pynbna paidbah na ka por sha ka por, hynrei ka jingai bylla ia ki khynnah kaba hapoh ka 14 snem ka rta ka dang don ha kane ka jylla Meghalaya.
Hapoh ka ain Child Labour (Prohibition and Regulation) Act 1986 hapoh ka kyndon kaba lai kala kren shai kdar ba lada don mano mano ba ai bylla ia ki khynnah kiba hapoh ka 14 snem ka rta u nongai bylla ynshah pynshitom.
Ban ia leh pyrshah ia kane ka kam ban khang ia ki khynnah ban trei bylla ka long ka jingeh kaba khraw, dei na kane ka daw ba ka jingrakhe ia kane ka sngi kumka sngi pyrshah ia ka jingia bylla ia ki khynnah la pynlong ha satlak ka pyrthei ban ai jinghikai ia ki briew.
Ha kane ka sngi bun na kiba la pynsngew ia la ki jong ki jong ki jingeh ki don kiba kwah ban pule hynrei na ka daw ka jingeh kaba ki ia kynduh kim shym la lah ban leh ia kata. Kidon kiba la ong ba ki kwah ban ioh ia ka jingiarap na ka sorkar ban ioh leit skul.(SP News)
