Shillong, Naiutng 11: Ka jingkylli mynta ka la mih ba balei ka sorkar Meghalaya kam shym la pynkynriah ia u nongialam jong ka seng GNLA u Champion R Marak naka Shillong District jail sha bar jong ka jylla kumba la thoh da u Director General Prison.
Ki thymmei khubor kiba la ioh da u SP News Agency ki iathuh ba u Director General Prison ba mynshuwa u Kulbir Singh u la thoh haduh hynniew tylli ki shithi sha ka sorkar jylla ban ong ba ia u Champion dei ban wengnoh na Shillong District jail lem kumta kan sa mih ka huri hura hapoh katei ka jaka, u la ai ka jingmaham.
U Director General jong ka tnad Prison ba mynshuwa u la thoh ia ka shithi kaba nyngkong sha ka sorkar ban ong ba dei ban wengnoh ia u tei u nongialam jong ka GNLA haka 15/03/2013 bad ia kane la shithi la phah sha u Principal Secretary home bad Chief Secretary jong ka jylla Meghalaya. Ha kane ka shithi la thoh shai kdar ba lada ym weng ia u na katei ka jaka kan mih ka jingkulmar.
Ia ka shithi kaba ar la thoh ha ka 19/03/2013, ia ka shithi kaba lai la phah haka 24/3/2013 bad ia kaba saw la phah ha ka 17/5.2013. Na ka liangjong u DG Prison u la ia kynduh ruh ia u Chief Secretarty ka jylla bad ka myntri kam poh iing ruh ka la tip ia kane ka jingthoh jong u DG Prison.
Ha u Bnai jylliew u DG Prison u la phah lai tylli shithi ha kaba ia dei bad kane ka juh ka kam ban ong ia ka sorkar ba dei ban weng noh ia u Champion na katei ka phatok ia kine ki shithi laphah ha ka 18/6/2013, ha ka 21/6/2013 bad ha ka 25/6/2013 bad ka jingiashoh ia dat hapoh phatok ka la jia ha ka 26 tarik jong u bnai Jylliew. Ha ka jaka ba ka sorkar kan weng ia u Champion na katei ka jaka ka weng kylla ia u DG Prison.
Ki thymmei khubor ki iathuh ban a ka liang jong u DG Barim ba dei peit ia ki phatok u la ai kajingmaham sha ka sorkar ba dei ban wengnoh mardor ia u Champion na katei ka jaka hynrei ka sorkar ka sngap jar jar bad ka leh kum bym mon bad ha dien ba la jia ka la weng noh ia u DG Prison na ka kam.(SP News)
