Shillong,Kyllalyngkot 20: Ka jingap khmihlynti jong ki paidbah ka Mawsiatkhnam bad ki shong kiba marjan ban ioh noh ia la ka jong ka jaka sumar ka la wan urlong mynta ka sngi hadien ba u Bah A.L Hek, Myntri ka Health and Family Welfare ka Sorkar Jylla u la plie paidbah ia ka Mawsiatkhnam PHC ha ryngkat ka jingsakhi lang jong u Bah Embhahlang B. Syiemlieh, MLA/MDC ka Mawlai Constituency, u Dr. A. Dkhar, DHS, Dr. R. M Lamare, DM&HO, East Khasi Hills, DHS (MI), u Bah J. Majaw, Rangbah Shnong Mawsiatkhnam, Bah Gervasis Kharmujai, ki Rangbah Shnong na ki shnong kiba marjan, ki dkhot ka KSU Mawlai Circle, ki paidbah nongshong shnong bad kiwei kiwei .
Ia kane ka PHC la buh mawnongrim ha u snem 2002 bad ka daw tynrai kaba la shimpor haduh khat ar snem ban plie ia kane ka PHC ka long namar ka daw ka jingbym don um. Kane ka jingbym lah ban plie ia kane ka PHC ha kine ki 12 snem baladep ka la buh jingeh ia ki paidbah kiba don ha kane ka shnong bad ki shnong kiba marjan ban shem jingeh bad wat na ka liang ka Khasi Students Union (KSU) Mawlai Circle ka la pyndonkam da ka RTI ban wad jingtip halor ka jingbym lah ban plie ia kane ka PHC kaba la sop da ki nuit ha ki snem bala dep.
U Bah Embhahlang B. Syiemlieh, hadien ba la shah jied kum u MLA ka Mawlai Constituency u la shimkhia ryngkat ka jingiatreilang bad ka Dorbar Shnong Mawsiatkhnam ba la lah ban plie paidbah ia kane ka jaka ai jingsumar mynta ka sngi da u Myntri ka tnat ka Koit ka Khiah ka Sorkar Jylla u Bah Hek.
Ha ka jingkren ha kane ka sngi kum u Kongsan ha shwa ban plie ia kane ka PHC, u Bah Hek u la ong, “ngi don hangne ban shakri ia u paidbah bad ka kamram jong ngi ki nongmihkhmat ka long ban phaikhmat sha ki paidbah kiba donkam ia ka roi ka par.” U la kular ruh ha kane ka sngi ba ia ki kam kiba lait ha kane ka PHC yn sa ai shwa sha ki trai shnong kiba la biang ha ka kyrdan jingnang jingstad.
U Bah Embhahlang MLA jong kane ka jaka u la ong ba shisngi shwa ba ka Jylla Meghalaya kan rakhe ia ka jingdap 42 snem ia ka jingioh ia la ka jong ka Jylla, ka Mawsiatkhnam ka dei ka shnong kaba donbok tam ban ioh ia kane ka jaka ai jingsumar ka ban pynmyntoi ym tang ia ki paidbah ka Mawsiatkhnam hynrei wat ia ki paidbah nongshong shnong na kumba phra tylli ei ei ki shnong kiba don marjan.
U ong ruh ba kum u MLA un sa shimkhia ban pynstet na ka bynta ban siangrong noh ia ka surok kaba poi sha PHC khnang ban pynsuk ia ki paidbah kiba don marjan bad kane ka jaka ai jingsumar. Ha kajuh ka por u la kyntu ia ki Engineer ban pynstet noh mar mar ban pyndep ia ki kam kiba dang sahteng ha kane ka shnong.
Ha kane ka sngi la ioh jingkren ruh na u Dr. A. Dkhar, DHS, Dr. S.S Dohling iba la ai ia ki symboh ban pashat sha ki paidbah halor ka jingmyntoi na ka koit ka khiah kiba ka Sorkar Pdeng ka lah ban ai sha ki paidbah ha ki shnong bapher bapher.
Lyngba kane ka PHC ki shnong ki ban ioh jingmyntoi kin long ka Nongkohlew, Umphrew, Umrynjah, Nongkya, Madan Mawkhar, Umden, Lum shyiap, Wahmyntait, Umjalynshir bad Umlyngkut.(SP News)
