Shillong, Iaiong 01: U Superintendent ki pulit jong ka East Khasi Hills u Bah MH Kharkrang u la ong ba ka long kaei kaei kaba sngewsih ban iohi ba ka jingshah leh beijot jong ki kynthei ha kane ka jylla ka la kiew wat la ka dei ka jylla kaba ai ka nam ka burom sha ka kynthei.
Na ka liang jong ki pulit ki la ialeh katba lah ban rat ia kane ka kam poh jaid, la ong ba tang ha poh jong ka East Khasi Hills District ka la don ka jingujor haduh hynriew tylli ki jingujor ba ki khynnah rit ki la shah leh beijot, kumba ka long mynta kane ka kam sniew kala kiew rasong.
Kaba sngewsih ka long ba kum kane ka jingshah leh beijot ka jia ha kito ki long iing kiba ka jingioh ka jingkot jong ki ka long kaba duna. Ka daw ka long ba ia ki khynnah la shu ieh kumto khlem da don ba peit ba sumar ia ki na ka daw ba ki kmie ki kpa ki leit ban trei bad ki nongleh kam sniew ki ioh ia ka lad ban leh ia kane ka kam poh jait.
Naka liang jong ki pulit ki la buh ba kane ka dei ka thong kaba nyngkong ban rat ia ki jingsniew bad kin nym ailad ba ki nongleh kam sniew kin ioh ban lait na ka kti jong ka ain bad ha ka juh ka por ka long ba ka ain ka dei ban long kham pyrikhing ia kine ki nongleh kam sniew.
Ka jingsngew khia ha kaba ia dei bad kine ki kam sniew kam dei tang da ki paidbah ha ka imlang sah lang hynrei wat ka tnad pulit ruh ka sngewekhia bha ha kaba ia dei bad kum kine ki jingjia dei na kane ka daw ba ki pulit kin nym aili ha kaba ia dei bad kum kine ki kam sniew ba u nongleh kam sniew u lait na ka tei jong ki pulit da kaba suk.(SP News)
