Shillong, Nohprah 08: U myntri ba dei peit ia ka tnad Information Technology jong ka jylla u Bah AL Hek u la ong ba haduh mynta kam shym don kano kano ka jingujor pyrshah ia ki website jong ka sorkar Meghalaya ba kim shym la buh ia ki jingthoh katkum ka jingdon kam.
Haba kren ha u SP News Agency u la ong ba lada ka don kano ka jingujor na ki paidbah na ka liang jong ka department kan sa iakren bad kata ka department ba ka dei ban pynbiang ia ki jingthoh ha ki website jong ki na ka bynta ka jingtip jong u paidbah.
Haba la kdew ia ka website jong ka ophis jong u Deputy Commissioner jong ka East Khasi Hills, www.dcshillong.nic.in ba kane ka website ka dang pyni ba ka East Khasi Hills ka dei kawei na ki hyniew tylli ki district jong ka jylla Meghalaya na ka liang jong myntri u la ong ba ym don jongtip ei ei ia kane.
Kane ka dei ka jingthoh kaba dang pyni haduh ka 8 tarik mynta u bnai nohprah ha ka website jong u Deputy Commissioner jong ka East Khasi Hills kaba ong kumne ha ka ktien phareng.
“East Khasi Hills is one of the 7 (seven) districts of the State of Meghalaya. The district occupies an area of 2748 Sq Km. And it lies between 25°07” & 25°41” N Lat. And 91°21” & 92°09” E Long. bounded by Ri-Bhoi District on the north, Karbi Anglong District on the north east, Jaintia Hills district on the east, Bangladesh on the south and West Khasi Hills district on the west.”.(SP News)
