Shillong, Lber 06:Kum shibynta ban buddien bad baroh ki political party kiba don hapoh ka jylla, ia kawei na ki Rai nalor kiwei kiwei kiba mih na ka Special Dorbar Ri kaba saw, ha Mairang, Hima Nongkhlaw, u Bah John F Kharshiing, Chairman, Ka Grand Council of Chiefs of Meghalaya, Ka Dorbar Ki Khlieh Nongsynshar Ka Ri Hynniewtrep, bad Spokesperson, Federation of Khasi States, u la leit ia kynduh ha ka 4 tarik March 2013, janmiet ha iing sah ha Shillong, ia u Bah Hopingstone Lyngdoh Nonglait, MLA, Basan Lyngdoh Nonglait, Hima Mawiang, & President HSPDP ban sngewthuh ia ka nongrim HSPDP halor ka ka Instrument of Accession and Annexed Agreement 17 August 1948 jong ki 25 tylli ki Hima Khasi States.
Ha kane ka jingiakynduh, kaba la neh jan ar kynta na ka liang u Bah John F Kharshiing, Chairman, Ka Grand Council of Chiefs, u la pyntip ia u Bah HS Lyngdoh, ba ka Dorbar Ri ka la rai ban pynlong ka jingiakren sngewthuh bad baroh ki party kynthup, Congress, UDP, HSPDP, NPP, NCP, ki mla Independents, BJP, ki Sengbhalang (NGOs), bad kiwei kiwei halor ka dulir kaba rim kaba u la ioh sei na Parliament kaba la pyllait paidbah hakhmat ka Special Dorbar Ri kaba Saw (Fourth Special Peoples Parliament 13 February 2013) kaba dei ka “White Paper On Indian States’, kaba la buh hakhmat ka Iing Dorbar bah Constituent Assembly (Parliament) ha u snem 1949, da u Shri. Sardar Valabhai Patel, Deputy Prime Minister, in charge Ministry of States, (kaba ngi khot Ministry of Home Affairs – MHA mynta), kaba kdew ruh ia ka kyrteng ki 25 tylli ki Hima Khasi States, kynthup ia ka tarik kaba ki 25 Hima Khasi State ki la iasoh bad ka Ri India ha ryngkat ki kyndon kiba la pruid dak ha kaba shai.
Ha katei ka jingiakynduh u Bah John F Kharshiing, u la ai ha u Bah HS Lyngdoh, ia ka copy jong ka shithi bishar 26 tarik April 2012 na ka National Commission for Schedule Tribes (NCST), kaba la bthah ia ka tnad Ministry Tribal Affairs(MTA) ban tuklar bad ban pynbeit ia kitei ki jingdkoh bad ki jingujor na ka liang ka Dorbar Ki Khlieh Nongsynshar bad na ka Federation of Khasi States.
Haba ia kren halor ka jingtyrwa ka Sorkar India ban pynbeit thymmai ia ka Sixth Schedule, na ka liang u Bah John F Kharshiing, u la pynpaw ia ka jingsngewsih ba kiba bun ki Dorbar Kur kim pat don ka jingiada da ka ain na ka bor KHADC bad u la pyntip ia u Bah Hopingstone Lyngdoh Nonglait, MLA, Basan Lyngdoh Nonglait, Hima Mawiang, & President HSPDP, ba ki don katto katne ki kam iing kiba ki Dorbar Kur, ki Dorbar Shnong, Dorbar Raid, Dorbar Hima, khamtam ki Bakhraw ki la dei ban wanrah kyrkieh ia ka Constitution jong ka Dorbar Kur (Bill – Act) hakhmat ka KHADC ba kan ioh ban pynlong ia kitei ki bor synshar Dorbar Kur kum ka Ain. Namar kiba bun ki Bakhraw (Myntri) ki dei kiba don ka bynta kaba kyrpang ha ka synshar khaddar tynrai.
Na ka liang u Bah HS Lyngdoh, MLA & President HSPDP, u la pynpaw ia ka jingkloi ban ia leit lang sha Delhi ban ia kren halor kine ki mat kiba long kiba kongsan bha ha kaba lyngba kitei ki dulir lah ban paw shai u pud u sam, bad kiwei kiwei ki hok jong ka jaidbynriew hakhmat ka Constitution Ri India. U la ong ba un sa rah ia kitei ki kot hapoh ka seng HSPDP, bad u la kyntu ia u Bah John F Kharshiing, Chairman, Ka Grand Council of Chiefs of Meghalaya, Ka Dorbar Ki Khlieh Nongsynshar Ka Ri Hynniewtrep, bad Spokesperson, Federation of Khasi States,ban ia kren ruh bad kiwei ki party khnang ba kin ia kren sani halor katei ka dulir kaba la dep don lupa ka report hapoh Parliament ka Ri India naduh ki snem 1949.(SP News)
